"Lliteratura", la más veterana de les revistes lliteraries que se publiquen n'Asturies, sal nesti 39 Día de les Lletres con importantes novedaes. Modifica'l formatu, abandonando'l tamañu grande que diseñara orixinalmente Jorge Fernández León en 1992, pa garrar unes dimensiones manuables, más pequeñes qu'un A4. Cambia tamién la dirección, en manes de Xosé Bolado dende l'empiezu, pa ser la escritora Marta Mori quien s'ocupe d'ella, con una variación nel Conseyu de Redacción: sal Vicente García Oliva y entra Berta Piñán. La nueva estructuración, en secciones con un dossier al frente, recuerda la d'otra revista lliteraria, "Campo de los Patos".
Esi dossier col qu'abre ye una interesante incursión na "Poesía última", na que participen 18 poetes, 5 muyeres y 13 homes, nacíos ente 1973 ( Pablo Suárez, el traductor) y 1993 ( Xaime Martínez). Repiten 5 poetes de la antoloxía "La prueba del once" de 2015 (el citáu Xaime, Henrique Facuriella, Iván Cuevas, Laura Marcos y Pablo X. Suárez), y incorpórense los ganadores de los últimos concursos, Miguel R. Monteavaro, Aida Escudero, Ana Medina, Moisés Cima, Solinca Turbón, Francisco Priegue o Inaciu Galán. Hai dos voces más que tamién suenen feches, Andrés Astur Treceño y Diego Solís. I rma González-Quevedo publica dos poemes de cenciellez espresiva, intimistes, nos qu'ofrez una evolución al respetive de lo que-y conocíemos hasta agora, arreyao a formes de la tradición popular. El panorama complétase con Llucía y David Fernández.
Xunto a les colaboraciones lliteraries del dossier hai otres nel apartáu "Poesía" ( José Luis Rendueles, Lauren García, M arisa López-Diz y Xosé Miguel Suárez), "Narrativa" ( Ana Martínez Sierra, Francisco Álvarez -que miedra como narrador con cada nueva entrega-, Raquel F. Menéndez y Xuan Porta) y "Traducción" (Cayarga ocúpase de Armin T. Wegner, Xilberto Llano de Jack London y Santori traduz del inglés tres poemes sobre gatos). Na sección "Actualidá" Marta Mori aproxímase a la historia y al significáu de les "timbes poétikes", mientres que Pablo Rodríguez Medina ufre un panorama lliterariu del 2017 más descriptivu que críticu. N'"Informes" Esther García repasa l'actividá de l'Asociación d'Escritores d'Asturies que preside y Rafael R. Valdés la de los seis Veranos Lliterarios que lleva coordinaos en Corvera. El númberu zárrase con tres "Reseñes" de novedaes lliteraries, quiciabes la parte que necesita crecer más en próximes entregues.
Hai una sección más, "Ensayu". Nella Pilar Fernández fai un averamientu a la perspectiva de xéneru na lliteratura femenina, ente lo metodolóxico y lo didáctico. Pel so llau, Claudia Menéndez, Pelayo Valduvieco, Marina Rodríguez y Xuan F. Bas proponen un canon de 12 obres de lliteratura xuvenil, seguramente discutible, pero del mayor interés: a la crítica lliteraria asturiana gústa-y más facer recuentos nominales qu'establecer categoríes, y equí los autores seleccionen y espliquen les sos razones. L'artículu de Laura Iglesia sobre la so esperiencia personal nel teatru, dende l'empiezu al alcuentru profesional con Adolfo Camilo Díaz que la lleva a involucrase nun teatru n'asturianu, más qu'un ensayu son unes verdaderes memories, una pieza mui bien escrita del mayor interés onde se xunten emoción, compromisu y profesionalidá. En definitiva, esta nueva etapa de "Lliteratura" llega con un númberu interesante a partir del cual podemos albidrar lo que quier ser el camín pal futuru: perspectiva de xéneru, diversidá de xéneros lliterarios y mestura de voces nueves xunto a otres yá consolidaes.
