Mientres se discute si la Universidá va ofrecer o non un grau de Gastronomía, qué sede va tener la facultá de Ciencies del Deporte o lo que van costar les tases de matrícula, David González Medina, portavoz d'Educación del PP asturianu, dedícase a repartir, pelos campus d'Uviéu, Xixón y Mieres, carteles cola bandera d'España.
González Medina estudió Filoloxía Hispánica, como un servidor, y tien que saber o, meyor, debe saber (perífrasis que, n'asturiano, indica posibilidá, nun garantiza nada) que "universidá" y "universal" salen del mesmu raigón lésicu. Covarrubias esplicaba, en 1661, nel primer diccionariu del español, que se llamaron universidaes les escueles del conocimientu xeneral xusto porque acudíen a elles estudiantes procedentes de tolos llaos. Ergo les banderes, toles banderes pero mui particularmente les territoriales (la d'España, la d'Asturies o la de Pimiango, qué más da), son un ente estrañu nel cuerpu universitariu, un tumor que procede estirpar.
Pero'l portavoz d'Educación del PP asturianu (vinculáu al sistema educativu como profesor de clases particulares, datu que nun ye irrelevante) sirve a una causa más alta que l'académica: hai que buscar griesca victimizadora onde sea. Y ye fácil suponer que los pocos años y la consiguiente sangre caliente cieguen los ánimos d'una parte de los universitarios, que s'arrinquen les banderes y que proliferen pintaes antifascistes alusives al casu. "¡Chuza!", esclamaba Pedro Picapiedra viendo caer los bolos na bolera.
¿Y depués? ¿Acusar al rector de peligrosu separatista porque sabe estremar una pala dientes d'una triente? ¡Peor tovía! ¡Porque lo aprendió usándoles! ¡A ver cómo s'atreve un aldeanu a presidir la Universidá asturiana! ¿Y depués? ¿"Muera la inteligencia"?
¿De verdá val too al serviciu del ésitu electoral? ¿Qué ansies son eses que nun ven sebe, qu'arriesguen la paz social como si se tratare d'una partida que se xuega con perres ayenes? ¿Ye fríu cálculu a la gueta del poder o odiu puro y brillante? ¿Nun habrá, nel PP asturianu, persones que dean preferencia a la razón sobre'l sentimientu, que quieran ganar les elecciones argumentándo-yos a los votantes... qué sé yo... que paguen más impuestos de la cuenta... o que les ayudes sociales son un abusu pal contribuyente... o que gastar na promoción del asturiano ye como tirar dineru a la mar...? ¡Algo argumentable, con más o menos aciertu, pero frutu d'un razonamientu! Non esta ceguera sentimental, d'antifaz banderil, que busca'l trunfu a la manera de la madre falsa de les dos que se presentaron delantre'l rei Salomón: partiendo al neñu con una espada.
miliorodriguezcueto.wordpress.com
