Suscríbete

Contenido exclusivo para suscriptores digitales

Milio Rodríguez Cueto

esti güevu sal quier

Milio Rodríguez Cueto

Asturiano elemental pa diputaos de Vox, 1: “algamar” y “afayaízo”

Voi facer que creo al portavox Ignacio Blanco cuando-y pidió aclaraciones a la conseyera de Cultura, Berta Piñán, el pasáu día 9 na Xunta Xeneral porque nun-y entendió les palabres “algamar” y “afayaízo”. Pues nada: equí tamos al serviciu del representante del pueblu. Verá, don Ignacio, cómo hasta usté acaba entendiéndoles si sigue p’alantre con esta columna.

Arrancamos con “algamar”. Va un par de veranos, esti que firma tomaba’l sol na playa de San Lorenzo, en Xixón. Cerca taben un par de muyeres d’una edá noble pero non decadente. Una d’elles, tan moderna como pechugona, tenía problemes acomodando l’anatomía nes copes de la pieza superior del bikini y quexóse-y a l’amiga: “¡Fía, nun m’algama la parte d’arriba!” Y l’amiga entendiola, oiga. Ya ve usté per ónde van los tiros lésico-semánticos (y nun tamos parlando del campu eróticu, nun se me despiste). Evidentemente, el verbu “algamar” acepta ampliaciones metafóriques del significáu, xusto igual que los castellanos “abarcar” o “alcanzar”, y, como esti últimu, construye perífrasis del tipu: “El diputáu de Vox nun algamaba a silenciar l’asturiano na Xunta Xeneral.”

Pasamos a “afayaízo/afayadizo”. Sí que m’estraña que nun conoza usté esti axetivu, don Ignacio, porque ye bien corriente. Como usté nun tien mala cabeza, seguro que-y saca’l significáu colos exemplos siguientes: “Al parlamentariu de Vox, la Xunta Xeneral nun-y resultaba afayaíza cuando se falaba asturiano.” Y: “El parlamentariu de Vox alcontraba mui afayaízu l’escañu y nun lu quería perder.” Ya-y digo que nun ye términu raru. Toi seguru que la gran mayoría de los sos votantes entiéndelu y una bona parte d’ellos úsalu de vez en cuando. El so predecesor na presidencia rexonal del partíu, Rodolfo Espina, con esi apellíu tan autóctonu, debe tar ente ellos, pamidea. Vamos facer un exerciciu: complete usté la raya de puntos na siguiente oración: “Rodolfo Espina integrose en Valores porque ya nun alcontraba Vox ………………”

–¡Algamar!

¡Home, ho!

miliorodriguezcueto.wordpress.com

Compartir el artículo

stats