Suscríbete

La Nueva España

Contenido exclusivo para suscriptores digitales

Milio Rodríguez Cueto

Notes inconstitucionales

Milio Rodríguez Cueto

Un alcalde de pates

La salida d’Uviéu de la Escuela de Mines

Los neños y les persones mayores somos enemigos de cambios (a mi métame nel segundu grupu). Alfredo Canteli, tamién (y usté sabrá qué etiqueta-y asignar). Ponse de pates pa que’l Rector nun-y saque d’Uviéu la Escuela de Mines y amenaza colo nunca visto nenyuri: movilizar la ciudá en defensa d’una titulación universitaria. El Rector ye de Xixón, ya se sabe: xente de poco fiar. Una amiga carbayona cuéntame que, de mocina, la güela avisábala bien pa que nun fuere de folixa a Xixón: “¡Nun hai más que putes y marineros!” Pues resulta que rectores tamién, les coses siempre pueden dir a peor. L’alcalde d’Uviéu, retóricu, entrúgase cuánta xente forma’l claustru universitariu, que nun s’opón al tresláu a Mieres. “Oviedo tiene 220.000 habitantes”, avisa, y ta claro, si hai palos na romería, quién lleva les de perder. Y da otra advertencia: “Los ovetenses saldrán a la calle a manifestarse para decir no al traslado.” A ún prestába-y ver tal cosa, una manifa enmucetada, embirretada y puñetera, porque hai que suponer que la diben encabezar los doctores mineros afectaos n’atuendu profesional y procesional. Y, del bracete, l’alcalde d’Uviéu. Y, detrás, 220.000 ciudadanos de la capital berrando “¡Minas, minas!”, porque nun tienen otra esmolición, ye lo único de lo que se siente charrar en chigres, peluqueríes, tertulies canines y confesonarios.

A ún lo mesmo-y da que la Escuela de Mines tea n’Uviéu, en Mieres o p’alluendi’l Negrón, na ancha meseta castellana, que, en realidá, diba ser una sede más acorde col tradicional ascu por tolo que suene a asturiano que distingue a les élites intelectuales d’esta tierra, con dalgún exemplu universitariu notable. Pero, nel casu presente, voi col Rector cuando defiende l’autonomía de la institución que gobierna. La enquivocación de don Alfredo, como tantes otres que sufrimos toos, ye de carácter nominal, pamidea. Ponga lo que ponga’l títulu, la Universidá nun ye d’Uviéu: ye d’Asturies, porque esiste gracies, fundamentalmente, al presupuestu autonómicu, non al municipal. Sobre les decisiones qu’afecten a la Universidá, los ciudadanos ovetenses tienen tanto que decir como los coyanos o los somedanos, y, si fuere cosa de pesu catastral, igual colaben toles facultaes pa Xixón.

Pa más desgracia, enterámonos de que l’Institutu Xeográficu Nacional quier arrampuña-y a la capital 270 díes de gües. ¡Faltaba, namás, que los sacaren del númberu 13 de la calle La Independencia!

Pase usté un bon día y acuérdese de que les ringleres qu’acaba de lleer tán escrites nuna lllingua inconstitucional que, oficialmente, nun esiste.

miliorodriguezcueto.wordpress.com

Compartir el artículo

stats