Los estadios de fútbol son les catedrales del presente porque’l fútbol ye la fe imperante. Ye cultu d’ascendencia pagana, que comarcaliza, con atributos específicos, la divinidá universal, como’l mundu antiguu fexo con Iupitter Optimus Maximus (Xove Heliopolitanu, Brixianu, Poenín…): United, Barça, PSG… A cumplir el ritu quincenal acuden, puntuales, los fieles, comulgantes en vestimenta y salmos, al pescuezu la estola pinta colos colores locales. Como cátaros contra católicos, como papistes contra protestantes, nun son rares les engarraes propter fidem. A la manera que los mesones medievales buscaben la vecindá de les catedrales, y hasta los sótanos del edificiu nalgún casu, el creyente actual alcuentra satisfación pa los sos apetitos nel perímetru d’estos nuevos templos. En fin: tocar ún d’ellos ye asuntu mayor que la feligresía discute con pasión.
En Xixón, proponen, mediando una montonera impúdica de perres (¡ríase usté del coste de la cooficialidá o de les subvenciones a la ópera d’Uviéu!), tirar el templu esistente y llevantar otru a un pasu. Les proyeciones publicaes estos díes en LA NUEVA ESPAÑA nun dexen sitiu pa la dulda: «mover» el Molinón ye un eufemismu. Hai qu’entender que los que tal plan proponen son los obispos efectivos d’esti tiempu, los amos del cultu: perbaxo la mitra, nun hai autoridá bastante pa entamar la obra de Dios nin pa decidir sobre la de les persones, como paez que ye’l casu actual, que traza rayes sobre suelu públicu col chénguere d’un preláu Medici. Albidramos una corte d’acólitos hosteleros levitante, extática, imaxinando un paraísu comercial nel cíngulu de la catedral proyectada. L’ayuntamientu playu prepara un reglamentu de laicidá que, piensa ún, naz caducu si nun incluye / escluye, tamién, esta nueva y poderosa clerecía. Pero, de momentu, l’alcaldesa nun-yos descubrió l’alzacuellos asomando alredor de la corbata y hasta comparte bañu pontifical (05/08/2022) na mesma agua que nun quier ver bendecir al párrocu de la otra fe.
Ún, ya lo escribió más veces, ye paganu, pero de los de verdá, de los antiguos. Dos mil años d’imposición monoteísta (unos sieglos menos nesta tierra) criaron callu como pa ver con desentendimientu escépticu, o fatalista, las marees cambiantes de los nuevos cultos, el de la cruz como’l del esféricu. Xingando los costazos, pensamos: «Busquen lo mesmo». Y son tan humanos como’l nuestru vieyu y adaptable Xove, que pa too tenía advocación: «Iuppiter Praedator».
Pase usté un bon día y acuérdese de que les ringleres qu’acaba de lleer tán escrites nuna llingua inconstitucional que, oficialmente, nun esiste.
