El domingu pasáu tuvo llugar nel pueblu de Valdesoto (Siero) ún de los eventos más importantes dientro del mundu de les festividaes asturianes: foi'l día de los Sidros y les Comedies. Esta cellebración pertenez al grupu de lo que los etnógrafos denominen como "mazcaraes d'iviernu", una tradición que tien un papel fundamental nel tiempu que rixe la cultura tradicional.
Discútese l'orixe romanu o prerromanu d'esta festividá, anque la so estensión aculló de les llendes romanes fai pensar que l'Imperiu asimiló una cellebración previa. Les mazcaraes, qu'Asturies comparte con munchos otros territorios d'Europa, tienen llugar alredor de los meses d'avientu y xineru y entemécense colos aguinaldos o aguilandos, rondes de moces y mozos que piden perres o comida peles estremaes cases de la parroquia.
Poro, nun ye complicao atopar nestes feches pelos caminos de San Xuan de Villapañada (Grau), San Xuan de Beleño (Ponga), o'l yá mencionáu Valdesoto (Siero) retacafilas d'estraños personaxes alegóricos antroxaos que visiten diferentes estayes del pueblu: el ciegu, que pidi dineru; los galanes y les dames, que baillen; la vieya, que de cuando en vez pare en metá de la cai; el mélicu, que va con bona facha y bien vistíu; el soldáu, que curia l'orde; la bestia y el demoniu, que apavorien a los neños más atrevíos y faen ruxir les llueques que lleven al cintu; el ceniceru, que porta un sacu al hombru enllenu de cenices qu'echa a la cara de la xente, o el vexigeru, que ye quien a solmenar a quienes ven la procesión con una vexija inflada.
Ello ye qu'estes folixes presten muncho a los guah.es (y tamién, claro, a los guah.es que yá medranon): causen muncha risión, como asocede siempre que lliberamos el deséu y les llendes de lo que ta bien tán a puntu de frañir. Nestos díes fiéndese la realidá, y aprucen nos pueblos de nueso dellos personaxes d'un mundu d'allende, seres demoníacos que pol contraste que xeneren permítennos ver más nidio el mundu d'aquende.
[Les mazcaraes d'iviernu constituín, por tanto, una bona ferramienta pa que les escolines y escolinos d'asturianu deprendan léxicu, pero tamién pa que s'averen a una modalidá teatral de fondu raigañu popular, y pa empobinalos dica una reflexión sobre la so rellación col mundu tradicional.
Les llamaes "Mazcaraes mayores", como ye'l casu de los Sidros y les Comedies, comporten amás la representación d'obres teatrales. Esti añu, L'Asociación pola Recuperación de los Sidros y Les Comedies 'El Cencerru', entamó dos obres: "Paziencia", escrita por Pergentino Martínez y representada polos Escolinos de Faes, "Nun ye comedia. Non ye non", de José Ramón Oliva, representada por adultos.
Dende Escolinos, suxerimos a los docentes d'asturianu la posibilidá d'aprovechar tamién la ferramienta y el material tradicionales, mesmo na forma d'un pasucáis que na d'una obra teatral, para reellaborar una tradición tan nuestra como universal.
