Miguel Ánxel Montenegro ye mayestru d'Asturianu nel CEIP Los Campones, d'El Berrón. Ende tien cinco grupos de Primaria, a los que se sumen los escolinos de sextu de primaria de ciencies naturales y sociales, a los que tamién fala n'asturianu davezu. Los vienres a la tarde, amás, ye profesor na Escolina de la Reciella n'El Remediu. Güei falamos con él, mui activu nes cuestiones rellacionaes col feminismu y el Día de la Muyer.
- ¿Cree que la educación tien de tener un calter feminista?
-Por supuestu, la escuela tien de tener los presupuesto d'igualdá y xusticia de cualquier democracia. Y esos son los que sostienen el movimientu feminista. La escuela en xeneral debería dar respuesta a cualesquier necesidá que rescample na sociedá, y el mio enfotu ye apurri-y al alumnáu les ferramientes que-y puedan valir pa solucionar los problemes que tope na escuela y depués, cuando salga. La escuela nun debiera ser ayena a lo que pasa, y la problemática del 8-M ye un reclamu social.
- ¿Cuála ye la conexón ente la enseñanza n'asturianu y el feminismu? ¿Enseñar na diversidá?
-Cuando hai un problema de repartu de roles en clas, y los roles de xéneru tán mui vivos nel alumnáu, enfótome nello y ellos danse cuenta, y son quien a aplicalo al so mundu. Ye importante frayar les muries que mos encierren tolos díes cinco hores na escuela y facer que lo que se ta trabayando nes clases valga pa la vida, y lo que pasa na vida valga pa les clases. Como mayestru, la mio función ye posibilitar y arriquecer esti aprendizaxe enllenándolo de los conteníos que desixe la llei: culturales, gramaticales, hestoria de la llingua, etc. Ye perfácil, si falamos d'igualdá, falar de muyeres que trabayanon na llingua en ámbitos estremaos, pone-yos cara a les muyeres nesti sen, etc. Cuando consiguimos facer too esto, y algamar ambientes de confianza, y que l'alumnáu y yo mesmu temos a gustu, pasen coses prestosísimes.
- ¿Qué acciones concretes desendolquen a lo llargo del cursu venceyaes a la educación en xéneru? ¿Y pol 8-M?
-Nos meses previos a marzu, fiximos análisis de los propios llibros de testu: cómo tán repartíos los roles de xéneru, cómo figuren más imaxes d'un xéneru o de otru? Tamién analizamos los espacios repartíos na prensa xeneral, prensa deportiva, etc. Too esto parte de la observación de lo que ta pasando, del día a día na escuela, y de la demanda de la Conseyería d'Educación nesti sen. En cuantes al 8-M, como tolos años, trabayamos figures de muyeres, y fiximos por frayar prexuicios escontra la muyer y escontra'l feminismu, cuestionando terminoloxía (como "feminazi") y desplicando'l vocabulariu nuevu que nun se conoz.
- ¿Estes reivindicaciones son más útiles si se vehiculen pente medies d'una educación innovadora y moderna?
-El otru día una neña con una capacidá d'empoderamientu na clas clamaba polos drechos históricos de les muyeres emplegando un vocabulariu como sororidá o deconstrucción, que a mi paezme increíble. Esto faise nes clases d'Asturianu, al dir a la gueta de la igualdá de xéneru, buscando pallabres, etc. Paezme un aprendizaxe ablucante. Y too esto si lo consiguimos facer en llingua asturiana, con una revisión de la llingua y de la gramática, ye maraviyoso. Nun me pongo medalles porque nun dexo d'aprender. Cuando apuestes por métodos d'aprendizaxe cooperativu, o aprendizaxe-serviciu, o inclusu activu, si dexes espaciu pa qu'elles y ellos investiguen y construyan en función de los sos propios intereses enllénase too d'una normalidá brutal.
