A efectos parlamentarios, Isidro Martínez Oblanca ye diputáu a Cortes pol Partíu Popular. La preba ye qu'Adriana Lastra nun lu llamó pa negociar la investidura, como sí fexo, por poner un casu, col representante electu del Partido Regionalista Cántabro, qu'algo sacaría pa la tierruca d'esa entrevista.
Esi escañu, nominalmente de Foro, diba sacalu igual el PP asturianu ensin falta de coalición. Cuando se negociaron les candidatures, nun yera ningún secretu la ruina musculatura electoral del partíu qu'un día fue, incontestablemente, d'Álvarez Cascos. Como en política nun esisten los regalos, hai que pensar qu'algo tendría que-y dar Foro Asturias al PP a cambiu de les perruques que lleva asociaes un asientu nel Congresu. Y, si votos nun son, ¿qué-y queda, si non la propia esistencia?
Ún tien la idea de que taba pactao qu'esta fuere la última lexislatura de Foro Asturias, non por consunción, que, d'una parte, pide un plizquín de paciencia d'unos y, de la otra, devalúa, d'un añu pal otru, el capital políticu col que puedan negociar los otros, sinon por absorción o, si usté quier, por surniamientu del PP. Pero nun val qu'unos cuantos, vamos poner la mitá del partíu, o les tres cuartes partes, o'l 90 % si quier... Nun val qu'una parte del forismu, por mui mayoritaria que pueda ser, decida renunciar a les sigles y picar, mansulina y fía pródiga, a les puertes de la casa común (que ya nun ye tan común) de la derecha. Tien que ser el total de la militancia la que s'entregue, hai que pesllar, candar y tirar les llaves a la mar: acabóse. ¿De qué-y val a Teresa Mallada face-yos güecu a Martínez Oblanca, a Pedro Leal y compañía si sigue viva otra opción de dereches, arrascando votucos n'ayuntamientos o na Xunta Xeneral?
Nun nos pueden engañar les esplicaciones más o menos verosímiles que los parlamentarios autonómicos Leal y Pumares quieran dar pa xustificar, caún del so llau, el raru espectáculu qu'ufierten estos díes, votando de manera antagónica baxo la mesma marca. Trátase d'imaxinar (d'imaxinase) un futuru. Ún piensa que Leal, de la mano de Cascos, vese a gusto de vuelta nel PP, partíu pol que ya fue conceyal notru tiempu; y que Pumares, d'otra manera, ye un rapaz de 30 años que nació a la política con Foro, nun siente la llamada señardosa del fraternal paraísu conservador cismontán previu al arrebatu casquista del añu 2011 y pue ser qu'hasta crea na posibilidá d'un partíu moderáu asturianu: la mocedá tien eses ilusiones. Pal casu que fuere, son ellos los que protagonicen, vicariamente, la guerra de los sos mayores. Y, esta vez, el pronósticu nun ta claru.
