Nin abiertes nin cerraes: entorniaes son les listes que la Xunta empieza a negociar. Nun hai conversador popular (entiéndase equí, por popular, del pueblu: inocente del pecáu de la militancia partidista) que nun se declare a favor de les listes abiertes. ¿Niégalo algún electu? Promuévase una consulta pa salir de dudes, que ye cosa seria. Pero nun hai dudes, qué va. Si la clase política nun fuere consciente d'esta demanda, nun diben decidise PSOE, IU y Ciudadanos a poner la cuestión enriba la mesa negociadora. Y como la petición de listes abiertes ye razonable (votar a la persona y non a la lista ya se fai pal Senáu, ergo mala cosa nun debe ser), podíemos esperar que los parlamentarios asturianos la rubricaren unánimes. Non: los tres de la iniciativa, adelantándose a un mal mayor, tán dispuestos a ofrecer, magnánimos, una versión reinterpretada maliciosamente, un paripé: que'l votante recoloque los puestos del dos al diez d'una lista dada. Cada nuevu chamullu pide bautismu cándidu y a esti quieren pega-y la etiqueta de "listes desbloqueaes".
Ofrécen-y al elector un entretenimientu puramente decorativu, intrescendente. Que'l candidatu númberu seis adelante al tres, ¿qué más da, si la fidelidá a la consigna del partíu ta garantizada pola deuda contraída col deu benefactor que te señala pa que formes parte de la nómina? Sigue siendo a les sigles? non: al amu circunstancial de les sigles, al que los electos-y van deber el puestu y los beneficios consecuentes, non al paisanu o a la muyer que los bailó nun papelín. Y, minimizando riesgos, malo será que'l cabezaleru intocable nun atope nueve oveyes, que berren al son qu'él xifle, pa esos nueve puestos de privilexu. Les oveyes negres, los cabritos o los llobos marutaos, si acasu entren na lista como testimoniu de la pluralidá interna del partíu, del puestu once al cuarenta y cinco.
Na Xunta Xeneral va debatise, estos díes, si priorizar la voluntá de los ciudadanos o los intereses de los partíos. Nel debate participa namás una de les dos partes, asina que' resultáu nun tien muncha intriga. Pueser, incluso, que, honradamente, nun lo aprecie asina algún parlamentariu asturianu, col olfatu democráticu atrofiáu pol poderosu tufu paternalista qu'impregna la política española.
"Nosotros somos los listos", sentí-y yo decir a un cargu autonómicu. Con "nosotros" enfrentaba les sos sigles a les demás, a "ellos", esos otros colos van negociar la reforma electoral. Los pronomes personales son intercambiables, seguro, y la dicotomía "llistos" / "fatos", reversible. En consecuencia, hai "llistos" en cualquier llau de la mesa. Los "llistos" van decidir por usté y por mi. Eso podía llamase despotismu ilustráu, nun faltando ilustración.
