L'ayuntamientu de Xixón abrió la caxa los truenos n'ochobre de 2013 cuando suspendió una actuación d'Albert Pla pa nun ofender a los que nun teníen pensao dir velu. Aquella vez fue por unes declaraciones independentistes: a Pla dába-y ascu ser español y quería poner a los escolinos xixoneses a estudiar catalán, igual que los catalanes tienen qu'estudiar castellano (situaba Xixón na provincia de Burgos, pamidea). Agora repítese'l cuentu con otru protagonista nes antípodes estétiques y polítiques. Francisco tampoco va actuar en Xixón, y en parte polo contrario: por ser un patriota. Truñó en términos faltones contra Mónica Oltra, la dirixente de Compromís, y el grupu municipal socialista apeló al precedente Pla pa pedir una nueva suspensión. Cúmplase, sentencia favorable.
Como dicen en barriu: A ver, tía, tío, lo que se pretende con estos vetos, ¿qué ye?, ¿devolve-y a la política insultada ("una de los nuestros") la dignidá que nunca pudo perder pola boca d'un cantamañas o, cenciellamente, penalizalu, echándo-y mano a la cartera, pa que nun se-y vuelva a ocurrir decir en voz alta lo que piensa? Tres coses sabemos de Francisco depués de lleer en prensa les sos declaraciones: nun vota a la izquierda, ye un patriota y nun s'escita con Mónica Oltra. Habralos y habrales, dientro y fuera del consistoriu xixonés, que discrepen d'él totalmente o por algún de los tres motivos sueltu, pero, si son medianamente razonables, tendrán que reconocer que los gustos de Francisco nun interfieren cola so condición de cantante empalagosu pa la que tamién esiste una audiencia dispuesta a pasar per taquilla, xente que nun sufre poles opiniones polítiques del cantante: llámalos insensibles si quies.
Atención: si nos ponemos a escargatiar na hemeroteca de tolos que vayan pasar pelos escenarios del país buscando declaraciones que dexen damnificados, acabáronse los directos. Nun veo por qué hai que ser más rigurosu con una actriz o un cantante que col peluqueru remungón que se caga na democracia ente tisoriazos, mientres nos va podando. ¿Va ser condición, pa dedicase al arte, nun pensar en voz alta? ¿O acéptense escepciones si son partidaries (Sabina o Víctor Manuel pa un llau, Norma Duval o Arturo Fernández pal otru)? Per esi camín, polo menos, los ciudadanos sí podíemos desarrollar un criteriu sólidu al tiempu d'estremar electoralmente ente PP y PSOE: la programación d'actuaciones estivales.
Censura. Llámase censura. Ye censura. Y, como siempre, la medicina contra'l mal recétala'l doctor Voltaire hasta cuando ye apócrifu: "Nin se me pasa pela cabeza asistir a un conciertu de Francisco, pero toi dispuestu a sacar una entrada pa que pueda dir usté si-y apetez."
