Nos últimos tiempos, la sección d'Ovieo d'esti diariu ye un parte de guerra.
Nun va tanto, taba de moda citar a Sun Tzu, en cualquier circunstancia y foru, como faru de navegantes en peligru. Había enteraos qu'atopaben en "L'arte de la guerra" instrucción tan válida p'afrontar el contratu futbolísticu d'un central agresivu como pa pleitear nun divorciu pol repartu de gananciales.
La premisa fundamental de Sun Tzu ye: "Tol arte de la guerra básase nel engañu". Sánchez Ramos, "Rivi", el conceyal carbayón de Cultura, pal casu tamién presidente de la SOF, ignora peligrosamente esti preceptu nel conflictu que tien entamáu con Otea, la sociedá que, en veranos anteriores, montó Gastromateo nel Campu San Francisco. Nun sabe o, lo más probable (y por escrúpulos políticos d'esa ascendencia cristiana omnipresente), nun quier ser llaín. A los responsables de Gastromateo espéta-yos a cara perru que nun cuenten con repartir casetes como si fueren los amos del prau. Peor tovía: al presidente d'Otea propúnxo-y presentase a les prósimes elecciones municipales si nun ta contentu. Cuidáu: eso mismo díxo-ylo Fernández Rozada un día, na calle, a Emilio León, y ya se ve en qué paró la cosa. El conceyal pisa tarrén resbarioso. Sun Tzu, pensando en Rivi allá pel sieglu VI enantes de Cristu, avisó: "Has ser del too misteriosu y confidencial hasta'l puntu de callar. Asina, vas poder dirixir el destín del enemigu." Y otra, frutu tamién d'un sueñu premonitoriu: "Val más conservar un enemigu intactu que destruilu. Conquista a los soldaos y domines a los xefes." Más claro que l'agua: la clave ta nos camareros, don Roberto. Inmovilícelos, gánelos, fáigalos funcionarios municipales en masa, corrómpalos si fai falta, y el Gastromateo queda ensin operatividá, porque "la victoria completa produzse cuando l'exércitu nun llucha [?] y véncese al enemigu pola estratexa". Pero, ¿qué estratexa hai en retalu pa que vaya a la guerra electoral, más tovía cuando l'adversariu consistorial de la mano afínal retáu anda cola cabeza embaxo'l brazu y hai un güecu evidente por tapar?
Otru frente de guerra del gobiernu municipal d'Ovieo, otru enemigu en danza: dos de los del tripartitu piden acabar coles dietesde los conceyales que nun tean liberaos (laboralmente) pa según qué plenos. El PP opónse, indignáu. Equí sí paez que l'equipu de gobiernu conoza con aprovechamientu al xeneral chinu: "La regla de les operaciones militares ye dexar ensin alimentu al enemigu tolo que se pueda." Pero, atención: "Nun consumas la comida de los sos soldaos" y "Si l'enemigu abandona de repente les provisiones, hai que les probar primero de consumiles, por si tán envenenaes." Pocos díes atrás, los antidieta (remuneratoria) dieron la primer truñida con aquel miniplenu de tres minutos; la segunda, retrucando al mandatu del Gobiernu español de cerrar empreses municipales deficitaries. Con cualquier ruíu puede facese la mesma música: "Usa munches señales pa confundir les percepciones del enemigu y que tenga mieu del to poder."
"Cuando l'agua se xunta nuna foz fonda, naide sabe medir la so cantidá." ¿Cuántos frentes ye quien a afrontar l'equipu municipal d'Ovieo ensin arriesgar una derrota? El terceru de los que vien dando cuenta La Nueva España ye'l más foín, contra'l que nun veo estratexa de la parte del equipu del alcalde. Ta produciéndose una invasión insidiosa y callada de la ciudá. Suxetos procedentes d'otres tierres ronden les calles con chulería. Empiecen buscando na basura lo que los ciudadanos desprecien pero naide sabe ónde los puede facer llegar la confianza. La xente míralos con rocea y prevención, ensin acercáse-yos. La policía, esposada pola lexislación vixente, limítase a custodialos, cuando los identifica, procurando que nun causen males mayores. Ye un exércitu que nun conoz más regles que la fame y la conveniencia, ayenu a negociaciones. Pa esta guerra sí que nun veo preparáu al tripartitu. Y nun toi falando d'inmigrantes: refiérome a gochos monteses.
miliorodriguezcueto.wordpress.com
Cola ayuda de la Conseyería d'Educación y Cultura del Principáu d'Asturies
