Los díes, pasando, pásen-y factura anímica a Javier Fernández, polo que se-y oye y lo que se-y ve na cara. Fue un resbarión notable argumenta-yos a los cinco millones y picu de persones que-y votaron les sigles qu'hai que poner per delantre'l gustu contrariu d'otros ocho millones que-yos sacaron la llingua. Otro tanto, copiar el palabreru infantil de Rajoy pa referise a "los buenos" y "los malos". Más tovía, negar "la palabra dada" en supuestu beneficiu d'una ciudadanía ignorante que depende de la sabia interpretación que faiga, según-y venga coyunturalmente bien, una minoría representante que lleva décades cebando d'esteroides l'autoestima. El fondu palmariu de cada declaración de Fernández ye establecer un paralelismu tramposu ente lo conveniente pal PSOE (nin siquiera pa la izquierda, que ye una categoría más amplia y non necesariamente en crisis) y lo conveniente pa España. Pero España y el PSOE son coses distintes, señor presidente de les Asturies. Depués, quéxase usté d'incomprensión. "Tengo la sensación de que me entienden más fuera que dentro." Sí, tien razón, pamidea.
Pero, ¿de verdá lo que quier Fernández ye que lu entiendan? Pues será pol dichu: "Tout comprendre c'est tout pardonner", entender ye perdonar. Pueser que, d'esa manera sutil, tea buscando'l perdón; pueser que lo faiga de manera inconsciente, incluso. O non, anque eso ye lo de menos. El papelón que-y toca desempeñar ye pa compadecese. Había que-y poner cara a la concesión que va consolidar a la derecha otros cuatro años (si nun son ocho o doce, depende de cómo venga la marea) nel Gobiernu d'España, a la traición a la masa social votante, a saber si a la liquidación de les sigles centenaries, y él asumiólo. Si fue sacrificiu personal en beneficiu d'una insegura causa mayor (partidista, nunca nacional o ciudadana: ¿qué hai más lleal pa colos españoles que dexalos actualizar la voluntá en tiempu real votando, en particular depués d'estes selmanes reveladores?) o un actu irreflesivu al que lu llevó l'ambición de protagonizar, fugazmente, les informaciones polítiques, ye lo de menos. Otru/a de la "los de dentro", con más espabilación, tará ya resfregando les manes; a otru/a aprovecerá-y que pasen ya estes novenes javierines de calvariu pa salir del güevu Kinder de los espíritus inocentes y castigar en Parlamentu, con firmeza y ensin mácula notoria de negociación nin entrega vergonzantes, los presupuestos anuales por venir o la llei educativa por refugar. Nin siquiera diba ser raro qu'esi querubín azorrón se permita, llegáu el momentu que convenga marcar distancies, palabres displicentes, crítiques o hasta condenatories pa colos que se dieron al PP, pa con Javier Fernández ente ellos. ¿Quién-y va querer garrar el ciriu a la Güestia pa quedar presu coles almes que ronden en pena? Y allá se va perder, xusto peles feches de Difuntos, na nueche de les Asturies ignoraes y pigarcioses, la llamina procesionaria de Javier Fernández, nel meyor de los casos desapercibida al par d'esa foguerona moza, esa lluminaria entamadora y agresiva, llegada pa facer el milagru, calecer los güesos del moribundu y resucitalu. ¡Y que nun haya un Shakespeare ente nosotros pa inmortalizar los personaxes!
miliorodriguezcueto.wordpress.com
Cola ayuda de la Conseyería d'Educación y Cultura del Principáu d'Asturies
