Blog 
Filazón
RSS - Blog de MªEsther  García López

Archivo

  • 31
    Marzo
    2017

    Comenta

    Comparte

    Twitea

    Oviedo asturias

    Llingua Asturiana na escuela

     

    Ábrese otru camín de lluz na escolarización del asturianu

     Esther García 17.03.2017 | 03:39

    Llingua Asturiana na escuela

    Pasaron más de cuarenta años dende qu'entamó'l procesu de recuperación de la llingua asturiana. Daquella, los qu'agora yá vamos vieyos yéremos xóvenes que nos comíemos el mundu, y, amás d'otres munches reivindicaciones, enfotámonos na recuperación y dignificación del asturianu.

    Una de les estayes importantes na que se trabayó foi na escolarización. Nel cursu 1984-85 púnxose en marcha un plan esperimental pa impartir clase de llingua asturiana. Escoyéronse seis centros pilotu que s'ampliaron al añu siguiente a diez. Ente ellos, na comarca d'Avilés, el colexu Fernández Carbayeda de Valliniellu y el colexu El Vallín de Piedrasblancas, nel que yo fui profesora d'asturianu y tuvi muncho que ver na puesta en marcha d'esta esperiencia escolar. Aquellos primeros escolinos tán ya na década de los cuarenta, y son padres y madres de familia y sacaron carreres brillantes y tienen oficios que desempeñen con escelencia y asistieron a clase d'asturianu. En comparanza colos que nun quixeron recibir estes clases, nun hai diferencies na so carrera de la vida. La única diferencia ye positiva. Ellos deprendieron asturianu na escuela y deprendieron a amar la so llingua.

    Asina, el procesu d'escolarización taba entamáu y yera'l niciu de lo que güei ya nun pue volver p'atrás. Hubo dende aquello un camín mui espinosu que recorrer en tolos ámbitos rellacionaos cola recuperación del asturianu. Foi avanzándose poco a poco. Nun se sabe por qué nesta nuestra Asturies les coses son diferentes que n'otres comunidaes con llingua propia. Nun sé si por inorancia o por falta de sensibilidá hacia lo que forma parte del nuestru mundu asturianu.

    Estos díes diose un pasín más. Tenemos l'anuncia de que l'asturianu va tar presente nel currículu del segundu ciclu d'Educación Infantil y amás tenemos anuncia d'otra esperiencia pilotu en diez centros escolares nos que van impartise delles materies n'asturianu, pasando asina a ser llingua vehicular. Nun hai dulda de que ye un pasu importante; ye una esperiencia que-y va abrir munches puertes a la llingua asturiana, que va poder usase con normalidá n'otres materies y n'otros contestos escolares, favoreciendo asina la so práutica. Una esperiencia novedosa n'Asturies pero yá normalizada n'otres comunidaes con llingua propia, porque tienen la suerte de que la so llingua seya oficial, porque tuvieron políticos con capacidá de decisión, que fueron sensibles a dalgo tan importante como ye la cultura propia de cada llugar. Güei la xente ta más concienciao y pienso qu'esto va ser el niciu d'afitar na escuela l'asturianu y de tener una escuela asturiana, que tenga que ver con tolos elementos culturales de nueso. Sicasí, esta anuncia por parte de la Conseyería d'Educación alimentó nos últimos díes abondes polémiques nos medios de comunicación. Les mesmes que se vinieron repitiendo dende hai 40 años. Siguimos sintiendo les mesmes babayaes y los mesmos argumentos ensin sentíu y ensin xustificación.

    ¿Por qué los asturianos nun sabemos amar y defender lo nueso? Y más dalgo tan importante como ye la llingua asturiana na que munchos pensamos, suañamos y amamos. Esta aversión al asturianu y a lo asturiano ye dalgo que dempués de da-y tantes vueltes a lo llargo d'estos años, enxamás-y alcontré esplicación. Quiciabes seya un complexu d'inferioridá hacia'l nuesu paisaxe cultural.

    Quédanos munchu camín par andar. Ánimu a los escolinos. Qué prestosidá poder deprender asturianu y n'asturianu na escuela.

     

    Compartir en Twitter
    Compartir en Facebook