Al terminar de lleer esta segunda parte del yá clásicu asturianu Fontenebrosa, ún nun pue dexar de mirar atrás. A l'altura de 1984, cuando sal la primer parte, la lliteratura n'asturianu que se publicaba n'Asturies movíase alredor d'instituciones públiques, como l'Academia de la Llingua, la Conseyería de Cultura o la Universidá. Tolo que s'editaba nesta llingua nun añu podía acarretase guapamente baxo'l brazu. De xemes en cuando surdía un rellumu voluntariosu dende la iniciativa privada, como aquella Comuña Lliteraria, de Xixón, que nun par d'años, ente'l 84 y el 85, sacó varios llibros pa desaparecer cásique misteriosamente.

Un de los llibros qu'editó Comuña yera Fontenebrosa, el reinu de los silentes, de Vicente García Oliva. Esti llibru tenía un aire d'edición clandestina; llevaba unos dibuxos inxenuos de la poeta María Teresa González, pero'l papel, la cubierta o la tipografía taben más cerca del voluntarismu editorial que d'una obra pensada pa un públicu xuvenil, igual porque daquella'l públicu xuvenil llector d'asturianu yera más un proyectu en marcha qu'una realidá, igual que la escolarización de la llingua. Pero aquellos llibros que salíen dende l'entusiasmu de los pioneros recibíalos un públicu espectante y entregáu, y al cabu de pocu tiempu agotábense.

Vicente García Oliva (Xixón, 1945) foi ún de los fundadores de Conceyu Bable. Escribiendo sobre manera lliteratura xuvenil creó territorios imaxinarios o personaxes que se convirtieron en referentes: el Merucu Xusticieru posiblemente seya'l de más proyección, pero tamién Ventolín o los Cimeros, y, por supuestu, Fontenebrosa y la mitoloxía qu'arrodia esi mundu d'aventures que pasa nuna Edá Media de magos, señores, espades, batalles y amores. Fontenebrosa ye un reinu ensin rei que ta dividíu en tres partes, la de los humanos o silentes, onde se desarrolla la primer entrega de la serie, na que se cuenta la llucha contra'l tiranu Rodolfo, el Gran Señor del Ferre. Otra parte ta habitada polos furadores, trabayadores y sabios, que teníen al mandu del Conseyu que los gobernaba a Eneas. Por últimu, la tercer parte del reinu yera la zona de llamuergues, onde vivíen los homosaurios, qu'entamen una rebelión contra'l magu Paniceres y el dogom Tuclum, axudaos polos protagonistes de la primer entrega, Ximena, Goyo, Dubardu y nuevos personaxes y amigos. Fontenebrosa II. La rebelión de los homosaurios recueye l'espíritu d'aventura de la primer entrega, la mesma pasión pola llibertá y contra la tiranía, nuna edición impecable, que nos fai entever que dalgo cambió nos venticinco años que pasaron dende aquella primer Fontenebrosa.