En 2017, les biblioteques de Xixón emprestaron 21.000 llibros menos qu'en 2007. L'agrupación local d'Izquierda Unida alármase. Diz que les biblioteques quedaron atrofiaes, que nun conecten cola mocedá. "Las bibliotecas ya no son sólo un sitio donde buscar libros en silencio. También son centros de reunión, de acceso a la información. Hay que adaptar el modelo y reciclarlo a los tiempos y necesidades actuales." Yo entiendo que son declaraciones de bona voluntá pero nun sé mui bien qué aporten, si nun ye meter mieu a los veceros faciéndolos imaxinar una pelea de gallos raperos, tutelada pola conceyalía del Cultura, al pie de la sección menos propicia pal eventu... la de música, por poner un casu.
Tres coses propón la edil d'IU Ana Castaño: más perres, más personal funcionariu y medíes pa tresformar les biblioteques de la ciudá en "espacios sociales de formación, participación y creación". Yo soi escépticu. Ta bien qu'aumente'l gastu y que s'actualicen títulos, anque nun me paez a mi que la causa del descensu de préstamos tea en que los xixoneses, nesta última década, ya leyeren les decenes de miles que-yos ofrez la rede de biblioteques; supongo que si hai más personal habrá más hores d'atención al públicu, por exemplu a esa hora punta d'afán lector que-y entra a la ciudadanía los sabados a les seis de la tarde; y, finalmente, polo que yo sé, les biblioteques de distritu de Xixón, o, meyor dicho, los edificios que les integren, ya ofrecen sales d'estudiu y espacios a disposición d'asociaciones de vecinos, proyectos culturales, esposiciones d'artistes noveles, etc. ¿Ónde ta la novedá de la propuesta, entós?
La caída d'empréstitos de llibros nun ye culpa de la xestión bibliotecaria, nin en Xixón nin en ningún llau. La xente desertó de la lectura y puntu. Nun ye la primer vez que propongo al paciente lector plantáse a les puertes d'una llibrería armáu de boli y papel, y pintar un palín por cada persona d'hasta trenta años que vea entrar (nun me valen los menores de edá acompañaos: nun vamos facer como la Hermandad de los Estudiantes d'Uviéu y apuntar cofrades ensin usu de razón). Casi nun tien falta nin siquiera de llevar boli pa facer l'esperimentu: lo que yo-y diga. Más tovía: a esi otru grupu de mediana edá que cree ser lector por perder el tiempu cola última policiaca nórdica o con soft-porno moderadamente sado-maso, vága-y desplazase hasta la biblioteca a pol llibru cuando lu tien a tiru, de manera inmediata, descargándolu d'Internet, dase por supuesto qu'ensin pagar porque, a esos efectos, tolos españoles colgamos a la ventana del ordenador la mesma bandera: la de la calavoria.
Va poco cumplí años y Google felicitóme: qué atentu ye (fue de los pocos). Pinché nel Doodle y abrió una páxina onde figuren los personaxes más notables colos que comparto nataliciu. Ye esa tontería que nos presta a toos, como si se nos pegare un átomu d'importancia pola coincidencia. Nel mio casu, la nómina empezaba bien: el mesmu día que yo nació Carlomagno en 742. ¿Depués d'eso, podía esperase más nobleza? Pues el segundu de la lista ye un emperador bizantín, Andrónico IV Paleólogu, que dio'l primer berríu en 1385 (nesos seiscientos y picu años que medien, los doses d'abril debieron producir namás gandaya impresentable en sociedá). Como ún nun ye muncho d'atender pa l'aristocracia, pasé volao a buscar escritores: Casanova en 1725, Hans Christian Andersen en 1805, Zola en 1840... ¡Bien, bien! Con eso ya cubrimos, anque algún otru segundón figuraba igualmente. Y había monxes, cures, políticos, pintores, inxenieros... De repente, en 1903 cuélase un futbolista. ¡Ui...! En 1907, el siguiente. La cosa va progresivamente a más, que tamién ye a peor, y el númberu de futbolistes aumenta de manera proporcional a la desaparición d'escritores hasta el puntu de que, de 1980 p'acá, figuren once balompédicos por ningún plumíferu. Los demás, hasta llegar a trenta, son deportistes d'otres castres, un DJ, actores y actrices (incluso una actriz porno transexual, que desanima munchu pa la teoría del átomu compartíu, casi tanto como'l DJ). Dirá usté qu'un escritor tien que cocer muncho más qu'un futbolista o una actriz transexual pa que nos lu sirva Google nel platu públicu de la notoriedá. Yo niégolo. Google ye sabiu (o sabia). Entiende con claridá lo que la conceyala xixonesa d'IU paez (querer) ignorar. Vivimos una época de carreres y cambios. Nada que ver cola constancia, la imperturbabilidá y la trescendencia de la lectura.
miliorodriguezcueto.wordpress.com
