La «estética de la usurpación» rescampla «La Gorda» de Botero sobada polos llimpiabotes. El bronce sobredorao yera florentino; el bronce abetunao ye dafechamente asturiano. El «Lleón» del Ayuntamientu -la primer estatua que tuvo la ciudá- mátase de risa coles ocurrencies de la Corporación municipal. Ye cosa de votar una ordenanza pa da-yos bayeta a los zapatos.
Al servus o a la cera, el broncerío carbayón tien un barniz pegañoso de zarzuela. Esa Gabinolandia qu'entafarra la vetusta ciudá con decoraos de ñoñería chulapona. El betún de Xudea con cera metalizao val bien pa imitar bronce sobre cartón piedra, pa una carroza'l Día d'América. Pero qu'una materia noble seya desllucío por una chambonada, eso ye mesmamente la estética de la usurpación.
La conservadura tien de saber hestoria y la roña betún llega hasta'l bronce de Clará, a la puerta la Universidá. L'anterior alcalde yera autodidauta. El d'agora ye más templáu cola Escuela d'Arte y podrá llustrase con dalgún profesor d'escultura. A la mano tien el Departamentu Conservación del Muséu. Un pocu más allá, a tiru piedra, la Escuela Restauración d'Avilés. Ta too estudiao, no tocante a pátines del metal.
Más qu'andar a la tema de masuñar el «Culón monumental», o'l «Pirulí de L'Habana» que camuda'l Campoamor en Paradise Club, fai falta un alderique sobre'l llugar de la escultura pública y les tres funciones del monumentu: l'artística o representativa de movimientos estéticos; la hestórica o memoriativa; la orniamental, que dialoga ensin delitu cola arquiteutura. Nuna pallabra, cuála ye la función del arte na ciudá.
Del bronce al betún, de la escultura al bricolaxe, la decoración uvieína nun s'arregla con un quítame p'allá un barniz. Hai que da-y un menéu a la estatuaria. Decapar falsures, resfregar la mollera col Muséu de Belles Artes y Facultá d'Hestoria del Arte, tornar a la Bienal Ciudá d'Uviéu, quiciás crear un premiu d'escultura pa nun facer arte urbano a deu. Eso sí, como l'espaciu ta petao, habrá que mover dalguna pieza pa llibrar del horror vacui, o facer rogativa pa que-y pruyera al Salvador una riada que llevara per delantre trastos y faroles hasta los alfoces del conceyu.
Y respetar al gran mayestru de la escultura asturiana Fernando Alba, que nun hai dignidá nes artes d'Asturies mientres nun torne al espaciu público la obra suya. Ésa sí que garra ferruñu d'abandonu. Hai que recuperala pa la ciudá, o la escultura pública d'Uviéu va siguir a l'altura del betún.
