Les actividaes dedicaes a la mitoloxía asturiana, nes que los mitos convirtiéronse nos protagonistes de l'actividá cultural, terminaron en Samartín del Rei Aurelio. Sicasí, esta iniciativa va espardese per otros insitutos del país y mentes el mes d'ochobre la esposición va poder vese nel IES Jerónimo González de Sama. Tamién va viaxar en payares a Grau, onde se va instalar nel IES César Rodríguez y na Casa la Cultura del mesmu conceyu. Trátase d'una esposición de dibuxos del ilustrador llangreanu Javier Iván Villa Vilchez, que pel momentu se pudo visitar na FEMEX y na Casona del Bravial de Blimea, onde tamién se contó cola intervención del etnógrafu y escritor Alberto Álvarez Peña, qu'ufiertó una charra sobre esta temática.
Tamién se recibieron varies visites de grupos escolares y se xubieron materiales didácticos a les páxines de facebook y twitter de la Oficina de Normalización Llingüística de Samartín, con unos materiales que se puen descargar de baldre y que se recomienden especialmente pal personal docente. Nestos momentos tán concretándose feches con otros centros, pero les persones o instituciones interesaes puen ponese en contautu cola Oficina de Normalización Llingüística de Samartín del Rei Aurelio nel teléfonu 985656110 o a traviés del corréu electrónicu llinguasra@gmail.com.
