Iniciativa pol Asturianu lleva organizando cursos d'asturianu dende la fundación de la organización. Los cursos en Xixón y n'Uviéu son habituales, asina como los cursos a distancia. Amás hebo delles esperiencies formatives n'otros llugares, como Valencia. Agora, y na esmolición por llegar al númberu máximu de persones interesaes por alfabetizase o deprender asturianu, la organización fai un esfuerciu organizativu y de recursos pa poner en marcha clases d'asturianu en 15 conceyos, mesmamente un cursu de gallego-asturianu n'Ibias, asina como'l so programa habitual d'enseñu a distancia al traviés d'una plataforma Moodle.
Los cursos van celebrase d'una punta a otra d'Asturies, dende Ribeseya a Ibias, pasando peles villes orientales de Les Arriondes o Cangues d'Onís, les grandes ciudaes d'Avilés, Xixón y Uviéu, o les cuenques mineres, con cursos en Sotrondio, Mieres, Llangréu y La Pola (L.lena). Súmense tamién llugares como Posada (Llanera), Candás (Carreño) y Valdesoto (Siero), nel mayor programa de cursos d'asturianu puestu en marcha por una organización asociativa. La vocación d'esti programa ye la de tener continuidá nel tiempu y cuntar col profesoráu que collabora cola organización pa poner en marcha estos cursos. Esti programa d'alfabetización tien l'apoyu de l'Academia de la Llingua Asturiana, qu'otorga los diplomes acreitativos a la fin del cursu. Los cursos tienen una duración de 35 hores, con clases dos díes a la selmana n'horariu de tarde. La matrícula, incluyendo materiales, ye de 60 euros. Los interesaos van poder apuntase hasta'l 16 d'ochobre, principiando les clases na selmana del 19 al 25.