Dende 1991 l'Academia de la Llingua Asturiana edita una revista qu'empresta atención a l'antropoloxía, Cultures, subtitulada "Revista asturiana de cultura". Dirixida por Roberto González-Quevedo, nella puen alcontrase estudios y testimonios sobre diversos aspectos de la tradición n'Asturies y Lleón, con más pesu de lo rural que de lo urbano o lo industrial. Cultures tien dedicao númberos monográficos a aspectos relevantes de la cultura tradicional como'l pan, la yerba, el gochu, l'espaciu agrariu, la sidra y el vinu, la fiesta, la pesca o a l'antropoloxía llingüística, combinando estudios académicos con aproximaciones testimoniales, nun sé si de munchu valor científicu (nun soi expertu nesti campu) pero sí mui entreteníes pal llector curiosu.
L'últimu númberu, el 18, empieza dedicando dos artículos al paisaxe asturianu. Nel primeru d'ellos el director de la revista, González-Quevedo, observa la evolución del paisaxe tradicional cola idea de sacar conclusiones sobre la tresformación de la cultura de les zones campesines y la decadencia na que s'atopa la familia que trabaya la tierra. Lo primero que ve ye la proliferación de bañeres pelos praos asturianos con una función nueva: nun tán ehí pal aséu personal sinón como bebederos pa los animales. González-Quevedo sabe que nes cases, a midida que la población avieya, van sustituyendo les bañeres por platos de ducha, más fáciles d'usar pa persones con dificultaes de movimientu, dándo-yos esti usu nuevu que modifica sustancialmente'l paisaxe rural. Ye lo que José Feito Fernández tien llamao sincretismu perversu, un contaminante visual que sirve como indicador de la crisis económica de la ganadería asturiana: si hai bañeres, esa explotación ye residual.
Margarita Fernández Mier, profesora d'Historia Medieval na Universidá de Lleón, parte nel so artículu del conocíu eslogan que fexo fortuna, "Asturias Paraíso natural", p'averase al paisaxe asturianu y a la so arqueoloxía, faciendo paraes de campu en Villanueva de Santu Adrianu y en Vigaña de Miranda. Observa Fernández Mier de qué manera lo qu'entendemos por natural (los praos y montes trabayaos pol ser humanu) son en realidá paisaxes culturales, y llama l'atención sobre'l peligru que s'escuende nes polítiques de xestión territorial si nes intervenciones sobre'l paisaxe prima lo contemplativo (la visión urbana) sobre lo productivo (lo rural). Pel so llau, Carme Pedrayes Toyos fai un artículu sobre la castaña en Villaviciosa, mientres qu'Alberto Álvarez Peña, qu'ilustra'l suyu con bien guapos dibuxos, publica una serie de cuentos asturianos recoyíos de la tradición oral y protagonizaos por animales.
Esti númberu, que recueye dos reseñes na sección dedicada a ello (poco, tratándose d'una publicación anual), lleva un artículu de Pablo García Cañón sobre l'asitiamientu de los valles de Babia y Llaciana na Baxa Edá Media, cuando n'Asturies cuando en Lleón. L'autor termina concluyendo qu'esa parte de la Montaña Occidental "constitúi l'escenariu d'un territoriu que xune, más qu'estrema, dous espacios pertenecientes a un mesmu tueru cultural". Acaba citando unes palabres de Martín-Granizo sobre Asturies y Lleón, publicaes en 1955, que parecen pensaes pa definir esta publicación y seique'l trabayu enteru de González-Quevedo: "...Pero nos une además, algo que creo más fuerte que los lazos materiales: la devoción a la tierra, el sentimiento de la tierra, el arraigo a la misma...".
