A finales del 2015 presentábase en Xixón esti númberu 19 de Cultures, la revista que dirixe dende 1991 Roberto González-Quevedo y edita l'Academia de la Llingua Asturiana. Cumple asina, esta publicación, la respetable edá de venticinco años editándose, y failo ensin otra celebración que la presencia nesi actu del Conseyeru de Cultura, Xenaro Alonso. Na propia publicación nun hai más referencia a esi llogru que dos índices, colos artículos y los colaboradores de tolos númberos.
Los primeros artículos d'esta nueva entrega ocúpense de los oratorios o capielles d'ánimes populares, pequeñes construcciones situaes na vera los caminos onde los devotos paraben a rezar poles almes de los difuntos de la familia, ofreciendo tamién productos del llabor agrícola, flores, veles o dineru según les pudencies o creencies de quien facía la ufierta. Nun testimoniu de 1928 Aurelio de Llano yá se llamenta de qu'eses capiellines esbarrumben cuando se construyen carreteres y la xente dexa de transitar pelos caminos onde se llevantaben. Quevedo, qu'analiza la so condición y llevanta acta del estáu nel qu'aporten a nós, quier ver nesa ruina "una oxetivación del espardimientu d'una nueva sensibilidá social y una de les munches metáfores posibles de la ruina d'Asturies". De cómo tán los oratorios nel conceyu de Villaviciosa da cuenta Xuan Pedrayes nel so artículu, ofreciendo'l catálogu y la planta, alzáu, perspectiva y elementos singulares de les 18 capielles que llegaron hasta él. Pel so llau, Manuel Francisco Matarín ocúpase de les ermites de los ríos Andarax y Nacimiento n'Almería, mientres que Carme Pedrayes Toyos lo fai de les fiestes, creencies y costumes sobre la muerte nel conceyu Villaviciosa.
Ramsés Ilesies y Xosé Antón Fernández "Ambás" interésense polos Aguilandeiros de San Xuan de Villapañada (Grau), faciendo un bon llabor d'investigación y rescate d'esta tradición. Hasta dieciséis yeren los personaxes d'esta mazcarada de Navidá. Esti trabayu tien l'espíritu inconfundible del Archivu de la Tradición Oral d'Ambás: actualización y proxección de futuru. Asina, una y bones fecha la recoyida de datos, na navidá de 2014, depués de 70 años, volvíen salir a la cai los guilandeiros de San Xuan. El director de la revista, González-Quevedo, publica tamién un trabayu sobre la "categorización de cultura ya naturaleza nos cuentos populares d'animales".
La revista inaugura sección nueva, "Histories de vida", cola que "quier atestigase formes de vida que dicen muncho de tolo que ye cultura asturiana". Los dos primeros relatores tán esperimentaos nel arte de contar histories: Milio'l del Nido, que retrata al so tíu Milio, "un paisanu", y Pepe Monteserín, qu'ofrez n'asturianu dos relatos sobre veterinarios publicaos enantes n'español nel so llibru Bendice estos animales que vamos a tomar (2014). Cultures 19 pieslla con una interesantísima reseña de Juan Alfonso Fernández, Director del Muséu de la Gaita de Xixón, sobre'l llibru-discu En ca'l gaiteru, de Pedro Pangua y Diego Pangua. Amás d'esplicar el conteníu del llibru y del cd, de contar cómo se recoyeron les pieces y cómo se rexistraron con instrumentos orixinales, contextualízalo y fai cincapié no que representa esti trabayu na evolución de la música de gaita n'Asturies, como "antídotu contra la despersonalización del 'mainstream' y el so descoloríu paisax sonoru".
