Quixo l'azar qu'abriera esti poemariu d' Alejandra Sirvent (Pravia, 1980) xusto pel momentu nel que, recreando'l silenciu y la quietú d'un paisaxe domésticu, repara l'autora nuna imaxe na que quedé atrapada: un suelu adornáu con "mazanes que caen como sapos duros" y "potes enllenes d'agua verde de lluvia". Esos cacharros vieyos, de mofu y porzolana, seique dispuestos en fila, atesoren l'agua llimpísimo que cai de los pingueros, gota a gota, con cadencia de reló, y que nos deprendieron que ye muncho más valioso pa regar que lo que sal d'un cañu. Y nesa imaxe de fruta feo y espeyos d'agua rasao y temblante, tan cercana y humilde, tan misteriosa y sentimental, atopé concentrada una definición de la totalidá d'esta poesía de la vida: equí ta la belleza, la fealdá y los efectos del pasu del tiempu sobre ello.
El reló de Sherlock Holmes entama con un recuerdu al primer trabayu poéticu de l'autora: Aquel amanecer (Premio Asturias Joven 1997) y recueye los poemes n'asturianu escritos por Sirvent, dalgunos yá espublizaos nel volume La prueba del once (Saltadera, 2015). Darréu vienen dalgunes poesíes exactes, clares y directes, de versos cortos, que glayen un esgarráu desamor y nes qu'una voz valiente y fuerte iña y llamenta la perda. Una voz escarnada pol dolor, enraxonada de rabia, qu'apella contra'l culpable de la desolación: "¿Por qué nun te maté/enantes d'aquel amanecer?", n'ocasiones dispuesta a la venganza: "Voi matate/ y la risa va conxelásete/ ente los dientes/ fatu/ payasu/ que yá nun m'ames" y otres veces rendida a los recuerdos y a la tristeza: "Soi un árbol desnudu y solu/ redoláu pola inmensidá d'una ñebla que güel/ a ti"; "El mio amáu tien el color del recuerdu".
La esperiencia personal dexa pasu a la contemplación y a la descripción del paisaxe y cuido que ye equí onde s'atopen los versos más llograos y les imáxenes más perfectes. A veces aislaos y significando en sí mesmos, a veces sometíos al serviciu d'otra intención, ye un verdaderu placer asistir a la propuesta de definición y cantu a la naturaleza d'Alejandra Sirvent: "Nun facía muncho/ que la plata naciente de la ñebla/ espardiera un reciu arume/ a almendrales olvidaos"; "Cañes caídes/ pescadores ociosos/ los abedules"; "A la mimosa/ llega l'ambiguu sol/ faciendo ñeve"; "Avergonzada/ pola lluvia la rosa/ desnuda espera"; "Nel pétalu d'una begonia duerme la fidelidá".
Pero la vida y el tiempu tamién pasen de manera inconsciente y midilos ha de ser, necesariamente, una esperiencia aproximadora, siempre inexacta ya insuficiente si s'anda pel camín del realismu. Tien que preparase'l llector pal abandonu de lo racional nesta parte críptica na que la lliteratura esbaria ente l'álbum modernista, el realismu máxicu y un catálogu d'imáxenes y vivencies figuratives, pero sometíes al surrealismu nel que l'instintu de l'autora dicta y trescribe recuerdos y sensaciones oníriques, percepciones sensoriales trataes desde'l subconsciente, de manera arrémente abstracta. De la novedá yá avisa'l cambiu que s'alvierte a simple vista: poemes de versos llargos, cercanos a la prosa. Tamién son densos y tán atiborraos d'exotismu domésticu. Llugares, oxetos y persones convertíos en seres especiales: una guinda artesana, una piedrina d'alfaxor, media frambuesa, una gargantiya de víbora xamaicana, pubs moriscos, espeyuelos nebulosos, polvinos d'esmeralda, palacios de llibros solombriegos, la voz d'un baillarín o los xestos d'una actriz de cine mudo. Una parte escura y estravagante, sometida al mundu de los sueños y sacrificada al serviciu de la estética ye la que s'apuntala como'l complementu necesariu a la parte cotidiana.
