Estos díes los deberes escolares son tema d'atención nos medios de comunicación y motivu de discrepancies na Comunidá Escolar de munchos centros educativos.
Los deberes siempre fueron tema de discutiniu ente quien ta a favor y quien ta a la escontra de recargar la xornada llaboral de los neños con más trabayos de los que desarrollen nel centru.
España ta ente los países que más hores de deberes lleven los neños pa casa. L'últimu organismu n'alvertinos foi la Organización Mundial de la Salú (OMS).
Los escolinos, van seis hores a clase y tán sometíos a la presión del trabayu escolar que ye tan duru como cualquier otru. Más llueu tán cargaos d'actividaes estraescolares: deportes, idiomes, danza, música o lo que pinte. Regresen a casa dempués d'un llargu día d'ocho o diez hores de trabayu. Eso si tienen la suerte de nun tener que garrar el tresporte escolar.
La mayoría comen nel comedor, y por fin, a les siete la tarde regresen cansaos ya inda tienen que ponese a trabayar. Esto nes edaes más tempranes habría qu'estudiar si de verdá contribuye a la meyora nel rendimientu escolar o pol contrariu, ye motivu d'angustia pa los neños.
La mayor parte les veces necesiten ayuda pa realizar les actividaes que-yos ponen pa casa. Si los padres nun puen prestar esti apoyu, deriva en recibir otra hora más de clase particular. La xornada llaboral de la infancia acaba siendo más llarga que la d'un adultu.
Ún de los argumentos en defensa de les tarees pa casa ye crear nos neños hábitu de trabayu y responsabilidá. La vida en sí requier constancia y esfuerzu personal.
La escuela prepara, o debiera preparar, pa la vida, socializar a los alumnos. Pero habrái que saber si los deberes ayuden a formen nesti sen.
Habría qu'analizar a fondo, el papel de los deberes nel desarrollu personal del rapacín y nel rendimientu académicu.
Sicasí, hai que tener en cuenta, qu'inda hai padres que consideren meyor profesor al que manda más deberes pa casa.
Col mitu del profesor güesu que ye'l más esixente y el que manda más deberes aliméntase en dellos casos la montonera de trabayu que los neños lleven pa casa.
Pasar la infancia con toles hores del día ocupaes pue tener a la llarga'l so coste. Los neños tienen que tener tiempu pa xugar y disfrutar de tiempu llibre. Por eso habría que dosificar les tarees pa desarrollar en casa.
De xuru qu'hai soluciones, pero pa ello hai qu'escuchar a la Comunidá Escolar, y non cambiar les lleis a caprichu de los políticos.
Pienso qu'esti tema, como otros rellacionaos cola educación de los neños, necesita estudiase a fondu y tomar decisiones avalaes por espertos.
L'Alministración educativa, que tien competencies y medios, ye quien tien que trabayar pa regular esti tema, ensin dexar que se dilía col pasar del tiempu, hasta qu'otru añu al entamar el cursu vuelvan a repetise estos y otros problemes.
