"Si el gobierno municipal hubiera actuado como había hecho con Albert Pla o como hizo con el bocazas de Francisco y hubiera anulado ese espectáculo, hoy no estaríamos aquí", declaró, fachendosu, Jesús Montes Estrada esti miércoles pasáu a les puertes del Tribunal Superior de Xusticia d'Asturies, onde lu diben xuzgar, en compañía d'otros, polos incidentes (fueren los que fueren) asocedíos delantre'l teatru Jovellanos el veranu de 2014. Aquel día actuaba un grupu de danza israelí. Una cantidá imprecisa de xente concentróse a protestar, non por homofobia y ascu a les malles (amás, esti grupu nun ye de los de malles), sinon, aprovechando que'l Piles pasa per Xixón, en simpatía colos palestinos. Paez ser que dellos fixeron por nun dexar entrar al públicu. Llegó la policía y, d'ehí p'alantre, nun hai acuerdu sobre lo que pasó. Los de la porra dicen que los calentaron los concentraos, ellos niéguenlo.
Pero la estratexa defensiva qu'apuntaba, coles sos declaraciones, el que fuere tantos años conceyal en Xixón, va per otru llau. Culpa a un terceru: al Ayuntamientu. ¿De qué? De nun decidir por él y polos demás ciudadanos lo que se puede o nun se puede ver. De nun censurar. ¡Más control, por favor, que nun quiero responsabilizame de los mios actos nin escoyer en llibertá lo que me gusta y lo que non! ¡Que me traten como a un menor, por favor! ¡Que repongan l'Index prohibicionista del Santu Oficiu! ¡Que lu amplíen al gustu de toles ortodosies, polítiques, relixoses y económiques!
Porque, según Churruca, había razones pa censurar (usté nun faiga casu, nun les hai nunca): la compañía de danza boicoteada "no era un grupo cualquiera, eran unos 'hooligans' del gobierno de Netanyahu y habían realizado un 'sketch' celebrando el 60 aniversario de la proclamación del Estado de Israel". Bueno: tamién Javier Fernández celebra, cada 8 de setiembre y al rau del arzobispu, el nacimientu del Reinu d'Asturies con una escabechina al moru y eso nun quita pa que lluza na solapa mediática la chapina de referente moral. D'otra manera, un "sketch" ye una pieza humorística. ¿Querrá decir Churruca que la compañía en cuestión fexo chistes o burla de la fundación del Estáu d'Israel? Nun s'entiende qué tenía contra ella aquella concentración propalestina, entós. ¿O será que Churruca nun sabe lo que ye un "sketch"? Pero vamos dexar pa prau esta cuestión y pasamos al otru anglicismu, que tampoco paez que domine.
Ún siempre catalogó al "hooligan" como animal enemigu de los centros culturales (ente ellos, los teatros) y gritón. Si, aquella tarde, hubo alguién que quinxo impedir la representación y pegaba voces, nun fueron los xudíos de dientro'l Jovellanos. Hai un video n'Internet pa comprobalo. Vese y óyese la concentración. L'eslogan que más coreen los asistentes diz: "¡Sionistas, asesinos!", yo entiendo que col ánimu d'aplicar esa doble etiqueta a los artistes, que taríen, naquellos momentos, calentando músculu ente bambalines. El portavoz de los concentraos (que mui concentraos nun se ven), sentencia pel megáfonu: "¡Peor que los nazis!" El contestu metonímicu vuelve a dar a entender que l'acusación apunta a los de detrás del escenariu, afirmación poco prestosa si se piensa que, lo más seguro, les families d'unos cuantos d'ellos, si non les de toos, dexaríen sangre en Treblinka, Dachau o Auschwitz. Y una voz femenina, imponiéndose al barullu, esclama: "¡El Mediterráneo, que se lo metan por el culo!" Políticamente, la imprecación confúndeme; fisiolóxicamente, espántame. ¡Menudu enema! ¡Esa sí que ye una ocurrencia digna del doctor Mengele!
Pero, garrando l'argumentu condenatoriu de Churruca en conxuntu, quiero decir, la idea de que taben ellí porque sabíen qu'aquellos bailarinos yeren unos influyentes sionistes qu'inspiraben la política antipalestina del gobiernu israelí, nun ta de más recuperar lo que, per aquelles feches estivales de 2014, declaró'l que yera portavoz de l'agrupación municipal na que militaba Churruca, Francisco Santianes: "No tenemos nada en contra de ese grupo, ni sabemos qué pensamientos tiene. Casi seguramente no están ni siquiera de acuerdo con lo que ocurre en Gaza. Pero consideramos que?"
Lo que siga ta too de más.
miliorodriguezcueto.wordpress.com
Cola ayuda de la Conseyería d'Educación y Cultura del Principáu d'Asturies
