La Nueva España

La Nueva España

Contenido exclusivo para suscriptores digitales

Esti Güevu Sal Quier

Perros

Quien en tiempu de paz maltrata a un can en casa en tiempu de guerra da un pasu al frente pa otres tortures

Perros

Los que convivimos con perros desarrollamos una empatía interespecial (permítame'l neoloxismu) sabedores de que ye motivu de burla ente la humanidá aislacionista. Danos lo mesmo: l'amor ignora y vence los prexuicios sociales. Digo esto porque quiero doleme, equí, del abandonu de doce cachorros en Siero y consolame col rescate d'once d'ellos con vida. Namás del primer añu d'esistencia pa en delantre, les persones vamos dexando atrás, intelectualmente, a los perros. Piense usté nel desamparu, fíu de la fame y el fríu, que pueda experimentar un críu de meses azotáu pa una cuneta, albentestate baxo'l cielu tapáu de la nueche de marzu, y póngase na pelleya de los chachorros de Siero. La pasiante que los salvó (avisada, nesti casu, por una galga anxelical) cuenta que nun ye la primer vez qu'apaecen cachorros de mastín pela rodiada. Camiento yo que, pa los vecinos, nun debe ser un misteriu de qué finca proceden, qué mano los abandona a la muerte. A efectos de devolver un saludu o d'enseñar el llombu según a quién, tien importancia. Porque tengo pa mi (y agora ye cuando m'espongo al ridículu anunciáu enantes) que'l que, en tiempu de paz, maltrata al perru de casa o tira pa la cuneta cachorros que-y nacieron na corte, n'horru o nel garaxe pa que los mate la xelada o los coman los raposos, en tiempu de guerra da un pasu al frente, ilusionáu, si se trata d'executar civiles, torturar prisioneros o delatar desafectos al bandu trunfante.

¿Soi un desaxeráu? Bueno: val más que nun se plantee'l casu, vistes les perreríes? perdón, les humanaes que-yos facemos últimamente a los animales per esta tierra. Esa xente, meyor que nun sepa cómo nos llamamos. Yo atrévome a apuntar pa escontra d'ellos en periódicu porque nun concibo que se solapen les condiciones de lector y canicida: sé que con usté nun cuerro riesgos.

Los perros son compañía del solitariu, medicina del hipercolesterólicu, guía del ciegu, autoestima del inseguru, proteción del miedosu, alegría del triste y tantes coses más. Munches persones van salir ganando col rescate de los cachorros de La Fresneda. Alégrome por eso doblemente y pído-y a Anubis, el dios-perru que lladra y mexa les esquines pel mundu de los muertos, que s'acuerde de morde-y un poco los calcaños al que los tiró a los matos cuando, indefectiblemente, s'empadrone naquel país.

Compartir el artículo

stats