Diagnosticar l'autismu en menores de trés años foi tradicionalmente una xera complexa y que podía retrasase tiempu enforma , pa desesperación de los padres, acoraxaos pola incertidume. La novedá surdió n'Asturies, onde l'asociación de families Adansi desenvolvió un procedimientu “de fácil aplicación” qu'utiliza la técnica de “eye tracking” pa rexistrar la forma de mirar de los bebés a partir de los trés meses d'edá. 

Dicho d'otru xeitu, la preba detecta l'autismu al traviés de los güeyos del pequeñu paciente. “La única collaboración que rique de los neños ye qu'afiten la so atención na pantalla onde se proxecten los vídeos diseñaos específicamente pa rexistrar los patrones de mirada”, esplica Gloria Acevedo Díaz, psicóloga, logopeda, directora del proyectu y especialista qu'atesora una llarga esperiencia nel campu de l'atención temprana.

Hasta'l momentu nun se dispón de nengún marcador biolóxicu pal autismu. Poro, el so diagnósticu ye puramente clínicu, basáu na observación. Ún de los oxetivos prioritarios d'Adansi, colectivu de familiares y persones con autismu d'Asturies, consistía en disponer d'indicadores tempranos d'autismu nel desenvolvimientu del primer añu de vida del bebé. Marcadores que pudieren ser fácil y oxetivamente detectables. 

Pioneru n'España

Y equí ta la respuesta. “El puntu fuerte d'esta técnica ye que dexa traducir  en valores numbéricos los patrones de mirada rexistraos”, puntualiza Gloria Acevedo, quien amiesta que se trata d'un proyectu pioneru n'España”. El diseñu metodolóxicu ta encontáu nel marcu conceptual que la esperta desenvolvió nel so llibru recién “Sobre el cerebro autista. Procedimiento de actuación temprana para niños y niñas con patrón de mirada diferente”.

Dende l'añu 2016, Adansi vien desenvolviendo'l proyectu “Cómo mira tu bebé”, un programa de detección y atención temprana d'indicadores de riesgu d'autismu, financiáu pola fundación Trapote, de Xixón. Los primeros resultaos presentáronse'l vienres 5 de marzu, al traviés de videoconferencia.

Nel proyectu realizáronse la valoración clínica y la valoración oxetiva de los patrones de mirada de 254 neños y neñes d'ente 3 y 36 meses d'edá. Separtáronse en trés grupos en función de les sos característiques: un grupu de control de 56 neños, con desenvolvimientu típicu; un grupu de 146 con diagnósticu de trestornu d'espectru autista (TEA); y un grupu de 52 neños con familiares diagnosticaos de TEA. Caún de los neños visualizó nuna pantalla una serie de vídeos diseñaos pal programa. 

“Con ellos tiense llograo provocar y rexistrar los patrones de mirada distinta que na clínica veníemos observando como indicadores d'alarma de TEA y que dende la neurociencia dellos estudios postularon como ‘Trestornu Nuclear del Autismu’”, señala Gloria Acevedo.