“Tranquilu, vamos sacate d'ehí”.
Diz el l.lenizu Antonio Ortega Escalada, xefe de la Brigada de Salvamentu Mineru d'Hunosa, que “nun hai dos rescates iguales”. Lo que siempres se repite ye una estratexa bien ensayada y la solidaridá, ensin tasa, d'un cuerpu históricu. Cúmplense 109 años dende'l primer entrenamientu d'una entidá con fonda reconocencia n'Asturies. Y dende el rescate de Totalán (Málaga) –onde trabayaron na recuperación del cuerpu ensin vida del pequeñu Julen, que cayó a un pozu– en toa España.
“¿Escúchesnos? Vamos entamar”.
L'aproximamientu hasta les víctimes, en casos de derrumbes o espacios confinaos, nun ye fácil. Ye por eso que la Brigada de Salvamentu entrena bien duro. Nel pozu Fondón (Llangréu), l'equipu cunta coles instalaciones pa preparase a conciencia y a diariu.
La “rampla” asemeya un tramu de pozu pa desplazamientos n'horizontal y en vertical. Hai otra zona de postéu y otra denominada “de tierra”. Nesti llugar practiquen técniques de sostenimientu, llevantamientu de derrumbes y zones colapsaes. La instalación completase con dos galeríes: “Modesta” –un túnel "carreteru” d'unos 250 metros de llargor y 6 d'anchu– y “mina La Nalona”, una galería de mina en fondu de sacu, de 100 metros de llargor y menos de 3 d'anchu. L'oxetivu d'esti espaciu ye recrear atmósferes irrespirables y d'escasa o nula visibilidá onde realicen exercicios de rastrexu, localización y recuperación de víctimes, lo mesmo que d'estinción de quemes.
“¿Cómo tas? Aguanta un pocu”.
Los momentos más tirantes d'un rescate coinciden coles maniobres más difíciles pa los miembros d'esta heroica “patrulla”. Ye por eso que ye obligáo caltener la calma: “Nós nun podemos tresmitir el nerviosismu que podamos tener. Eso ye esencial pa garantizar l'ésitu de la intervención”, esplica Ortega. Y añede: “Cada persona reacciona d'una forma distinta. Hai persones que tienen un accidente grave y tán seles. Y otres que tienen un accidente non tan grave y tán más nerviosos. Naide sabe cómo va reaccionar”.
“Procura nun te mover, vamos llegar yá”.
La mina acaba, el so llabor va ser infinitu. Siempres. Nos últimos años, amás de rescates soterraños y en túneles, especializáronse en cueves y otros llugares confinaos. Tamién formen a otros cuerpos de seguridá. Estes selmanes, ello ye que tán impartiendo un cursu de “microvoladures" –esplosiones controlaes pa evitar daños– nel pozu Monsacru de Morcín. Alleguen un total de noventa axentes de Policía Local y Guardia Civil.
“Yá tamos equí, agora va vete un médicu ”.
Nes intervenciones más enguedeyaes, o cuando la víctima tien males traces, el médicu aporta con ellos hasta'l llugar. “Ye entós cuando'l doctor decide si se tien que suministrar una melecina”, esclaria Ortega. Mientres l'exerciciu de 2020, señaló Ortega Escalada, realizaron delles intervenciones y cinco rescates. El más entrañable: un perru que cayó nun pozu en monte. “Pudimos recuperalu. El prestu que da esti trabayu ye impagable”, asegura'l xefe de la Brigada de Salvamentu.
Grande ye'l so lema: “Naide queda dientro de la mina”. Y más grande, porque ellos ayuden ensin preguntar, la familia minera.
“Compañeru, tranquilu na camiya, que yá tamos fora”.
