La estampa ye digna d'un anunciu de televisión. La cosa va d'aprender xugando y divirtiéndose. Y el Centru de Recepción ya Interpretación del Prerrománicu Asturianu, n'Uviéu, cumple con esta premisa ce por be. Hasta'l 30 de setiembre, tanto asturianos como turistes pueden allantar mirando d'una forma distinta dos de los monumentos más relevantes del Principáu: en pieces de Lego, Santa María del Naranco y San Miguel de Lliño, amás d'una escena costumista, concretamente, una ferrería mecanizada.
Ye'l Prerrománicu de xuguete. “Gústame más asina que cuando lo espliquen d'otres formes más aburríes”, señala Elena Arranz, una turista madrilana de 15 años.
Lladriyu a lladriyu, pieza a pieza y ensin escaecer detalle nengún. L'Asociación d'Aficionaos a Lego n'Asturies, “Asturbrick”, llevaba muncho tiempu trabayando nesti proyectu, la idea yera esponelo'l branu pasáu, pero la pandemia llegó pa tresmanalo tou.
Los sos planes atoparon baches nel camín, según cuenta Clara García, responsable de la esposición. La falta de suministru de lladriyos foi'l problema clave. Sicasí, aquello qu'avanzaren cuando'l baturizu del coronavirus entá nun nos absorbiera, sirvió-yos d'ancla pa caltener de fierro les sos intenciones. Casi dos años depués, puede dicise que l'esfuerzu valió la pena. Cuenten que cientos de persones pasen pel Naranco pel branu a ver esti trabayu titánicu. Los monumentos del Prerrománicu yá formen parte de la familia Lego.
Santa María del Naranco y San Miguel de Lliño precisaron unos venticinco mil lladriyos, ente que la escena costumista dalgunos menos, cerca de cuatro mil. Faceles a escala nun foi xera fácil. Clara García cunta que, nel casu de San Miguel de Lliño, sirviéronse solo de les proporciones de la puerta pa poder llevar a cabu'l restu de la construcción. La estética ta bien cuidada, respetóse hasta'l más mínimu detalle, ello ye que los técnicos de “Asturbrick” quixeron face-y sitiu a la parte de San Miguel de Lliño qu'esbarrumbó a finales del sieglu XI. Taba too bien pensao, inclusive l'interior de les figures. Anque alpenes se ve, si se retirara'l teyáu de los monumentos, la estructura interior taría reflexada talo como ye, nun escaecieron nada, recrearon hasta los arcos faxones.
“¡Ehí ta “Scooby-Doo”!”, esclama Nora Agrassot, una pequena turista catalana. Pero non solo él, Harry Potter, influencers o personaxes de “El Señor de los Aníos” xueguen tamién un papel protagonista nestes representaciones, un chisgu evidente a un mundu de fantasía y humor.
Una manera distinta de ver l'arte qu'atrai a neños y adultos. La responsable de l'actividá confiesa que, anque se suel dicir que la propuesta va dirixida especialmente a un públicu infantil, la inevitabilidad de los desplazamientos en familia nesta dómina braniza fai que los adultos tamién lu disfruten. “Paezme una forma perorixinal d'amosalo, realmente, ye increíble, encamentaríalo”, confesó Neus Pascual, que visitó la esposición acompañada de la so fía.
Nel Centru de Recepción ya Interpretación del Prerrománicu entá nun saben si la esposición va espurrise más allá del mes de setiembre, con vistes al entamu del cursu académicu y a la reactivación de les escursiones d'escolares, pero lo que tienen claro de xuru ye que'l nuevu proyectu de “Asturbrick” va tar nes sos vitrines nes próximes selmanes. Una réplica del Monte Naranco ye la so nueva idea, entá en proyectu.
Esta forma de ver, entender y aprender nuevos aspeutos del Prerrománicu nun ye nueva. Siempres se trató d'amosar estos monumentos de forma distinta p'atraer toles miraes, les de los más comenenciudos nesti arte, “A mi, personalmente, el Prerrománicu y el Románicu encántenme en toles sos formes”, dicía Isabel Hernán, turista madrilana, pero, tamién, les de los más desapercibíos. Nel so día utilizáronse gominoles, papel o porexpán, inclusive, trabayaron con Playmobil, una de les competencies más directes de Lego. Nun hai meyor forma d'emponderar l'arte qu'esperimentando con él.
La posibilidá de poder observar en distintos formatos unos monumentos que'l públicu yá vio a escala real enantes de visitar la esposición ayuda a ampliar la so mirada más artística.
Tamién ye una bona antoxana p'aquellos que prefieren echar una güeyada a les bizarres propuestes d'esti Centru primero de dar un bon paséu pelos monumentos o asistir a una visita empobinada.
Personaxes
La orixinalidá tamién rescampla nesta amuesa. Nun quedaron namás n'axuntar les pieces pa dar forma a les distintes estructures, tamién introducieron a los famosos moñecos de Lego. Estos nun son namás personaxes medievales, de la dómina na qu'asitia'l Prerrománicu. Quixeron da-y una vuelta a la situación y da-y un toque de modernidá a les figures.
Pel branu, l'arribación d'esta zona supera siempre lo esperao, visiten Uviéu y el Prerrománicu cientos de persones allegaes de dellos llugares d'España y, tamién, d'otros países. Estes propuestes innovadores consiguen arrincar siempre la sorrisa de los visitantes, cuenta Clara García, “anque agora colos mázcaros nun se vea, a lo menos albídrase”.
Horariu y talleres
La esposición “Lego-mánico Asturiano” puede visitase, nos meses de xunetu y agostu, tolos díes, de diez de la mañana a dos de la tarde y de trés y media a siete de la tarde. En septiembre, l'horariu camuda, les visites van concentráse de miércoles a domingu dende les nueve y media de la mañana hasta la una y media de la tarde y, depués, dende les trés y media hasta les seis de la tarde. La entrada ye llibre.
El Centru de Recepción ya Interpretación del Prerrománicu preparó tamién pa esti branu una serie de talleres pa neños d'ente cinco y doce años: “¡Prerrománico: Creatividad con Lego!” Ayudaránlos a crear pieces de dalgunos de los edificios más representativos del Prerrománicu Asturianu y, sobremanera, dexarán-yos xugar y esperimentar col mundu Lego. Cunten con catorce places en cada sesión y el preciu de la entrada ronda los cuatro euros. Van facer volar la imaxinación de los más pequenos de la casa.
