El conseyeru de Salú del Principáu d'Asturies, Pablo Fernández Muñiz, señaló esti miércoles que la comunidá autónoma tien el 80% de la población vacunada con pauta completa y rexistra un descensu de la incidencia de coronavirus.

Asina lo apuntó en declaraciones unviaes a los medios pola so participación na xunta telemática del Conseyu Interterritorial del Sistema Nacional de Salú.

En concreto, el conseyeru esplicó qu'el 92% de la población diana yá ta vacunada n'Asturies, el 87% con pauta completa, y en población total algama'l 85% de les persones n'Asturies, el 80% con pauta completa.

Igualmente, refirióse a la población escolar pa indicar que'l 86% de los neños ente 12 y 19 años yá tán vacunaos, y el 42% cuenta con pauta completa "colo que la situación ye abondo favorable de cara al empiezu del cursu".

Amás, comentó que la incidencia va "en descensu", anque sigue en niveles altos a 14 díes, con una incidencia de 319, qu'asitia a Asturies, sicasí, "perbaxo de media española, que supera los 500". Coles mesmes, la incidencia ta perbaxo de los 1.000 casos nuevos en población d'ente 14 y 30 años, "pero entá ye necesario menguar cifres de contaxos nuevos".