La mayor parte de les escavaciones que fixo'l conde de la Vega del Sella costeóles él mesmu, ensin nenguna subvención estatal, mesmo que tampoco recibió ayudes pa la realización de los sos trabayos d'investigación.
Tres l'españíu de la Guerra Civil, un grupu de milicianos presentóse na so residencia de Nueva de Llanes, deteniendo al mayor de los sos fíos, Ricardo, firme defensor de la causa monárquica, qu'acabaría siendo brutalmente asesináu. Esto terminaría por facelu enfermar y aceleraría la so muerte, asocedida'l 28 de setiembre de 1941.
El próximu 28 de setiembre cúmplese'l 80.º aniversariu del fallecimientu d'ún de los arqueólogos, botánicos y naturalistes más relevantes del so tiempu. Coleccionista y mecenes, bona parte de la so colección foi donada al Muséu Nacional de Ciencies Naturales de Madrid y al Muséu Arqueolóxicu d'Asturies
El VIII Conde la Vega del Sella, pernomáu prehistoriador nacíu en Pamplona el 11 de xineru de 1870, yera'l mayor de trés hermanos (tenía dos hermanes menores, Trinidá y María). Provenía d'una noble familia d'oríxenes asturianos y cántabros, de calter lliberal, y escorrida polos partidarios del carlismu, que tuvo que s'exiliar en Bayona, onde'l mozu Ricardo estudió la so etapa de Primaria nel colexu Saint Bernard. Ellí esconsoñó'l so interés poles Ciencies Naturales, pola Hestoria y pola Arqueoloxía, materies descomanadamente relevantes na formación académica de la Francia del postreru terciu del sieglu XIX y que Ricardo va cultivar tou'l restu de la so vida.
El padre del nuesu protagonista, Ricardo Benigno Duque de Estrada y Bustamante, finó en Bayona en 1876 ensin poder tornar a España, daqué que va facer tola familia tres la definitiva derrota de los últimos esquicios carlistes. Asitien entós en San Sebastián, onde Ricardo llogró'l títulu de Bachilleratu. Asina, con apenes 18 años, aporta a Uviéu pa entamar la carrera militar, que depués nun va siguir porque prefier estudiar Lleis, llicenciándose en 1892 na prestixosa Universidá de la capital asturiana. Namoráu como taba de tola rexón, decidió establecese na localidá de Nueva de Llanes en contrayendo matrimoniu, el 2 de xineru de 1897, con Ignacia Samaniego Errazu, que diba morrer el 20 de setiembre de 1900.
La so familia, de raigón na zona, tenía un formosu palaciu edificáu nel sieglu XI (d'esta fecha solo se caltién la llamada “Torre de los Aguilar de San Jorge”) y que perteneciera hasta'l sieglu XVII a la familia cántabra de los Estrada, nomaos condes de la Vega del Sella a partir d'entós. Ellí creó un gran xardín con una enorme variedá de plantes y árboles frutales que-y van sirvir pa desenvolver los sos estudios de botánica. Per esti tiempu, Ricardo conviértese nel principal benefactor del desenvolvimientu económicu de la comarca llanisca, contribuyendo al financiamientu d'obres públiques, de la llínea telefónica ya inclusive del ferrocarril.
Tres la muerte de la so primer esposa, volvió casar, el 26 d'agostu de 1901, cola VII Marquesa de Canillejas, María del Rosario de Vereterra y Armada (grande d'España y fía del marqués de Gastañaga y Deleitosa), con quien va tener seis fíos. Ricardo metióse entós en política, llegando a formar parte del Partíu Conservador y siendo diputáu pol distritu de Llanes-Cangues d'Onís, vicepresidente y presidente de la Diputación Provincial d'Uviéu y senador por esta provincia en 1914.
Col pasu del tiempu, Ricardo Duque de Estrada asitió en Madrid, convirtiéndose nún de los miembros más destacaos de la intelectualidá de la dómina y desempeñando cargos d'especial caláu, ente los que destacaron el de presidente de la Sociedá Española d'Antropoloxía, Etnografía y Prehistoria, presidente de la Real Sociedá Española d'Hestoria Natural y profesor honorariu del Muséu Nacional de Ciencies Naturales. Asina, l'orixe de l'actual colección de Prehistoria del Muséu Nacional de Ciencies Naturales, que de la so creación celébrase esti añu'l so 250.º aniversariu (1771-2021) y formada por alredor de 23.000 bienes culturales, anició con bona parte de los exemplares llograos y donaos a la institución por el mesmu conde.
Nesti contestu créase, en 1912, la Comisión d'Investigaciones Paleontolóxiques y Prehistóriques (dependiente de la Xunta pa l'Ampliación d'Estudios ya Investigaciones Científiques, JAE), con sede nel muséu, una de les instituciones más relevantes encargaes de la promoción y espardimientu del estudiu de la Prehistoria nel nuesu país y que cuntó cola participación de nomes como'l del propiu Ricardo, Eduardo Hernández-Pacheco, Enrique d'Aguilera y Gamboa, marqués de Cerralbo (artífiz del muséu madrilanu que lleva'l so nome) y los arqueólogos Hugo Obermaier, Paul Wernert o Henri Breuil. El resultáu del so llabor foi'l descubrimientu d'un bon númberu de xacimientos prehistóricos, principalmente na zona cantábrica, que los sos materiales arriquecieron les colecciones del muséu, amás de la edición de delles memories onde se recoyeron los relatos de dichos afayos.
D'esta miente, el conde de la Vega del Sella afayó, estudió y publicó (costeaos por él mesmu) dellos trabayos sobre la cueva del Penicial (atopada por él en 1911, con restos d'industria lítico en cuarcita toscamente llabrada y a que'l so estilu denominó “Asturiense”), sobre la cueva del Cuetu la Mina (Posada de Llanes) en 1916, sobre la cueva de Morín (Villascusa, Cantabria) en 1921 o sobre les cueves de Riera y Balmori (tamién na zona de Llanes), en 1930. Asina, les investigaciones del conde de la Vega del Sella van resultar esenciales pa establecer la secuencia cultural del Paleolíticu cantábricu, estableciendo clares relaciones col Paleolíticu francés.
Ricardo Duque d'Estrada destacó tamién na realización de delles monografíes sobre la climatoloxía peninsular nel Paleolíticu Cimeru, sobre'l dolmen de la capiya de San Cruz (na contorna de Cangues d'Onís) y onde ta la llábana histórica que señala la so edificación pol rei Favila o los estudios xeolóxicos y climatolóxicos del Pleistocenu.
Gran amante de la tierra asturiana, a la que sentía como de so, siempre pasó los sos branos equí, siguiendo los sos estudios sobre Prehistoria en San Román de Candamu o na cueva de la Paloma (valle de Les Regueres).
La so enorme capacidá de trabayu y la so intelixencia y humildá nel aprendizaxe convirtiéronlu nún de los más importantes estudiosos de la Prehistoria española, otorgando al llabor científicu valor, prestíu y honestidá investigadora.
