Tou apunta a qu'éstes fueron les últimes navidaes nes que se va sacar carbón del pozu Nicolasa, en Mieres. La estracción de combustible va caltenese en 2022, anque va dir amestada al desenvolvimientu de les obres d'hibridación na central térmica de La Pereda, propiedá de la empresa pública Hunosa. Pero la cuestión ye qu'entá nun hai una fecha fixa, debío sobremanera al retrasu nel desarrollu del proyectu por mor, ente otres cuestiones, de la pandemia. Pendiente ta la negociación colos sindicatos, mesmo qu'otres cuestiones d'interés, como la puya eléctrica de biomasa a la qu'Hunosa va tener que presentase pa poder abrir la so planta alimentada con combustible sostenible. 

Los trabayadores de Nicolasa tamién son conscientes de que nun van pasar otra Navidá como esta última. Eso sí, el fechu de que dexe de sacase carbón nel pozu nun quier dicir que vaiga cerrar darréu. Una vegada que cese la estracción van tener qu'empezar los llabores de postminería (esmantelamientu seguru), qu'inda s'allargarán dellos meses. 

Hunosa, pela so parte, tamién caltien activa la central térmica, unes instalaciones que funcionen a plenu rendimientu y que, como aseguraba'l secretariu xeneral del SOMA, José Luis Alperi, “tan ayudando a ameyorar los precios de la eletricidá, yá que si la central tuviera zarrada, el preciu de la lluz sería inda mayor”. Tantu'l SOMA como CC OO n'Hunosa defenden que'l pozu siga abiertu hasta que la central de La Pereda se modernice. El secretariu xeneral de CC OO n'Hunosa, Adrián Miguel Pérez, esplicaba que “tampoco nun hai proyectos que garanticen la continuidá de tou l'empléu, tantu'l fixu como'l de les contrates”. 

A lo llargo de la firma del últimu plan d'empresa yá se faló de la continuidá de l'actividá estractiva nel pozu Nicolasa, “pero había ciertes duldes, por eso fai falta qu'haya una nueva negociación cola empresa”, apuntó Alperi. Ello ye que la fórmula que s'utilizó por que'l pozu pudiera siguir activu cuando se taben zarrando toles esplotaciones de carbón del país ye que'l combustible estrayíu fora p'autoconsumu, esto ye, p'alimentar la caldera de la central térmica de La Pereda. 

Pero'l plan de la compañía estatal, y ún de los sos principales proyectos de futuru, yera la hibridación de la térmica pa que pasara a tar alimentada por biomasa. Nun principiu, afitábase'l mes de xineru de 2022 pal entamu de les obres na planta, lo que supondría'l zarru del pozu a finales del mes pasáu, cosa que nun asocedió. El retrasu nos planes da la razón a los sindicatos, que pretendíen que se caltuviera l'actividá estractiva. Y tamién paez que dende'l Gobiernu central naide se dixo partidariu del zarru antemanáu del pozu. Eso a pesar de que sí había delles dudes ente los trabayadores pola postura contraria al carbón que caltien l'Executivu central, concretamente la vicepresidenta tercera y ministra pa la Transición Ecolóxica y el Retu Demográficu, Teresa Ribera, a la qu'acusaron en más d'una ocasión de “demonizar” el sector del carbón. 

El plan de tresformación de la central térmica de La Pereda pa qu'utilice biomasa forestal foi aprobáu va un añu pol conseyu d'alministración d'Hunosa. La conversión de la planta, como aseguraben dende la compañía, supondría la creación de casi 200 nuevos puestos de trabayu rellacionaos cola xestión de la biomasa forestal, amás de caltener los actuales 73 empleos que tien la planta. El so costu, 41 millones d'euros. Y ye qu'ente los cambeos que va haber que desenvolver tán l'adaptación de la caldera, la incorporación d'una tecnoloxía qu'incrementa la potencia neta de la planta cola meyora de la eficiencia del ciclu de refrixeración –un sistema denomináu Ciclu Higroscópicu, una tecnoloxía desenvuelta pola inxeniería asturiana Imasa– y un sistema d'almacenamientu loxísticu del combustible. 

Biomasa

Amás, Hunosa tien una apuesta tan importante pol sector de la biomasa, qu'acaba de constituyir el Polu Tecnolóxicu y Empresarial de la Biomasa n'Asturies. L'asociación ta integrada por una trentena d'empreses y entidaes y tien como oxetivu ser el impulsor de l'actividá forestal, del aprovechamientu d'estos recursos y elementu tractor de la crecedera del sector.