El Gobiernu del Principáu d'Asturies informó esti día de qu'axentes del Mediu Natural y personal técnicu de la Conseyería de Mediu Rural y del CSIC-Universidá d'Uviéu lliberaron una utre nel parque natural de Redes. L'exemplar permaneció los postreros nueve meses nun centru del Principáu, concretamente en L'Infiestu, onde se lu trató de les diverses mancadures que presentaba y recibió rehabilitación pa recuperar la so condición física.

L'ave foi recoyida'l pasáu branu, concretamente'l 31 d'agostu de 2021, por axentes del Mediu Natural y treslladada al centru de recuperación allugáu en L'Infiestu. Cuando atoparon al animal, el so estáu yera "semicomatosu, presentaba desnutrición y deshidratación graves y una frayadura nel ala esquierda". Dende'l Principáu esplicaron que tres les primeres cures, y una vegada superaes les mancadures que se-y detectaron por parte de los veterinarios, al animal lleváronlu al voladeru esterior del equipamientu de la localidá piloñesa "pa recuperar musculación y les óptimas condiciones de vuelu".

Como ye habitual nesti tipu de situaciones, enantes de la so lliberación, a la utre mangáron-y dos anielles y un emisor GPS que, amás de dexar realizar un siguimientu de la so evolución, consigue que l'ave pase a formar parte de la rede centinela de llucha contra'l venenu y el furtivismu n'Asturies.

Esti día, y depués de casi un añu de recuperación, l'animal pudo volver ser llibre. En llevándolu nuna xaula al parque de Redes, los técnicos abrieron el transportín, y l'animal salió disparáu a garrar el vuelu.