Uviéu pása-y revista a los sos horros y paneres. El conceyu tien diez d'estes construcciones de titularidá municipal que, por delles circunstancies, alcuéntrense n'estáu de caltenimientu de lo más diverso. Por casu, la panera que ta llantada nún de los caminos que serpentea'l céntricu Parque d'Iviernu ta como nueva; sicasí, a unos cuantos kilómetros de distancia, l'horru de San Llázaro de Paniceres alcuéntrase n'estáu de ruina. El Conceyu propúnxose mete-yos mano pa tratar de convertilos nun interés turísticu más de la ciudá. Pero, como nestos casos, les obres a realizar van por barrios. O, meyor dicho, por horru. Unos, los que tán peor, van ser rehabilitaos. Y el restu van sometese a un plan de caltenimientu. 

Énte esta disparidá d'estaos, la conceyalía d'Edificios y Patrimoniu y la de Xestión del Patrimoniu ellaboraron un censu de tolos horros y paneres de titularidá municipal. Nun foi un trabayu complicáu. Nes fronteres municipales habiten diez d'estes construcciones y munches d'elles, ello ye que tán bastante céntriques. Como curiosidá, el barriu de La Corredoria, con trés horros, ye la zona del conceyu que tien una mayor concentración d'estos edificios que d'antiguo se destinaben a guardar y caltener los alimentos del mugor y caltenelos alloñaos de los animales. Agora, nes zones más céntriques los vecinos úsenlos como llugares nos que buscar una solombra en díes de calor. Ello ye que los de La Corredoria tán integraos dafechu nel parque de La Cabornia apegáu a la estación del tren. 

Los vecinos d'esti populosu barriu lleven yá unos cuantos años reclamando al consistoriu una actuación integral que permita salvar a lo que llegaron a calificar como “xoyes del patrimoniu” de La Corredoria. Con una pequeña esceición, los d'esta zona d'Uviéu nun son de los qu'en peor estáu s'alcuentren. Namás nún d'ellos va haber qu'actuar a xeitu. 

Yá col llistáu na mano, la conceyalía d'Edificios y Patrimoniu que dirixe Luis Pacho realizó una primer visita xunto a los operarios de la contrata municipal que s'encarga del caltenimientu a estes diez construcciones. L'oxetivu yera echar una primer güeyada al estáu nel que s'atopaben. El siguiente pasu, rellaten dende'l consistoriu, foi'l de contactar cola Asociación d'Amigos del Horru Asturianu pa tener una xunta y facer con ellos una nueva visita, que tuvo llugar fai yá un mes. Allá per mayu. Ye esta agrupación –que nació en Candás por 2016– y que tien ente los sos oxetivos la xestión y conversación d'estos bienes la que ta ellaborando un informe pa establecer el “algame de la intervención a realizar en caún de los horros y de les paneres del conceyu”, apunta la conceyalía. 

Tán trabayando yá nello, pero poles visites yá realizaes el Conceyu yá se fixo una idea de cuála tendría de ser –asina perriba– el trabayu que se tendría de realizar. En dellos casos va ser cenciellu, pero n'otros la situación ta daqué más complicada. 

 Ye más, el consistoriu da por descontáu qu'en dellos va tener que se facer reformes fondes pa intentar igualos porque'l pasu del tiempu y l'abandonu fueron llaceriándolos. Luis Pacho señala que “una vegada que nos presentaren l'informe, p'aquellos horros que nun sía posible encarar les intervenciones colos contratos de caltenimientu (los ordinarios del consistoriu) va encargase un proyectu y va entamase la so igua”. 

De mano, el conceyal yá apunta a qu'hai un horru de los trés de La Corredoria y una panera que ta allugada a la entrada de Lluniego a los que va face-yos falta una intervención a xeitu. Un nuevu llaváu de cara y non un caltenimientu de chapa y pintura como asocede na mayoría de los casos. Son dos casos coles sos peculiaridaes. Por casu, el de La Corredoria viose afectáu por una quema allá por 2019, fai agora trés años, que lu dexó abondo tocáu. Anque sigue de pies, pero con bastantes desperfectos que son visibles a güeyu. Pa garantizar la seguridá y ayudar a que'l deterioru nun fora a más, el Conceyu decidió abarganalu. Funcionó. L'horru aguanta sobre los sos pegollos. Distinta ye la situación de la panera de Lluniego. Nesti casu foi l'imparable pasu del tiempu'l que foi erosionando esta construcción, que la so cubrición paez tar a piques de cayer a cachos. Tamién s'alcuentra abarganáu pa evitar males mayores. Amás, la conocida como subidora –les escaleruques de piedres– tán invadiendo la cera, lo qu'obliga a los vecinos a tener qu'invadir la carretera cuando traviesen esa zona. 

Pero d'ente los diez inmuebles que figuren nel inventariu hai un casu especial. Ye'l del horru de San Llázaro de Paniceres que ta de mui males traces. Tanto que de la parte cimera d'esta construcción casi nun queda nada de pies. Nesti casu concretu, onde les evaluaciones visuales realizaes nun dexen llugar a dudes sobre l'estáu, el Conceyu camienta yá delles alternatives. Una sería la de llevantar un horru nuevu o adquirir ún nuevu y llevalu hasta Paniceres, y donar les pieces del actual al conocíu como Bancu de los Horros, una iniciativa entamada pol Centru Tecnolóxicu Forestal y de la Madera, que ta allugáu en Pumarabule (Carbayín, Siero), y que se dedica a recoyer pieces d'horros per toa Asturies pal so tratamientu, catalogación y puesta a disposición pa la rehabilitación d'otres construcciones etnográfiques. 

Magar estos casos daqué más complicaos, la mayor parte de los horros del conceyu tán en bon estáu de caltenimientu. Los pegollos aguanten.