Magar les dificultaes de los conceyos pequeños pa competir n'igualdá de condiciones con alministraciones de mayor tamañu nel llogru de fondos europeos, Ayer nun se da y presenta ambiciosos proyectos pa pegar un cambiu integral al conceyu, aprovechando al máximu les nueves tecnoloxíes y los recursos disponibles. Y nel últimu campu nel que quieren sumar esta dixitalización ye nel de la ganadería. El gobiernu local decidió presentar un proyectu de 1,5 millones d'euros pa la creación d'un centru de xestión intelixente del ganáu, una iniciativa que s'enmarca nun ambiciosu plan pal tresformamientu de la plaza del mercáu de Cabanaquinta, que dende'l Conceyu quieren convertir na exa ganadera del conceyu. 

L'alcalde, Juan Carlos Iglesias, esplicó que la iniciativa lleva delles actuaciones incluyíes. "Per una parte, aprovechando les naves qu'hai nel mercáu, queremos facer un centru de trazabilidá de la carne de caza, que traería una sala de despiece con atención veterinaria, y que taría dedicáu a marcar esa trazabilidá de la carne de los cazadores, que sería donada a xente necesitada o comedores sociales", esplicó'l rexidor. 

Per otra parte, n'otra de les naves, el plan municipal ye'l de crear un centru de xestión intelixente de la ganadería. "El Principáu entamó un proyectu piloto, nel qu'hai dos ganaderos ayeranos escoyíos, pa poner chips nos crotales del ganáu y ser quien a allugar les reses ensin necesidá de tener que xubir a los montes", esplicó'l rexidor, qu'axuntó que "nós lo que queremos ye desenvolver esti proyectu pa tolos profesionales del conceyu d'una forma muncho más ambiciosa". Juan Carlos Iglesias indicó que "nós queremos ser ambiciosos, y que tolos ganaderos qu'asina lo quieran puedan participar nesti proyectu al traviés d'esti centru municipal que va tar instaláu en Cabanaquinta". Amás, esti proyectu trai la creación de, siquier, un puestu de trabayu. 

El proyectu global que va competir por una partida del fondu de Recuperación, Trasformación y Resiliencia tamién trai l'acondicionamientu y urbanización de tola parcela del mercáu de ganáu, alredor de 8.000 metros cuadraos, p'habilitar un mercáu al aire llibre, que tamién s'instalará coles últimes tecnoloxíes: valles intelixentes, espacios más sostenibles....

Desinfección

El proyectu que tien el Conceyu d'Ayer pa Cabanaquinta va más allá d'esti mercáu intelixente. La idea ye facer de la capital del conceyu'l gran centru ganaderu del conceyu. Ello ye que la primera de les actuaciones va empezar nos próximos díes y consiste na construcción d'un centru de desinfección de vehículos ganaderos nel mesmu ferial. La idea ye qu'esti serviciu pueda utilizase pagando una tasa municipal, que'l Conceyu tien d'afitar, pero que sía que non va ser algamadizu pa los profesionales del sector. La desinfección de los vehículos de tresporte de ganáu ye daqué obligatorio cada vez que quieran treslladase animales, y ye un serviciu col que'l conceyu nun cuntaba magar la importante cabana ganadera, una de les más potentes d'Asturies. 

Ello ye que na memoria del proyectu, anque inclúi datos de 2017, rescampla la importancia del sector n'Ayer: 569 ganaderos y 4 sociedaes y 573 esplotaciones, que se traducíen en casi 10.000 reses, más de mediu millar de cabeces de ganáu caprino y otres tantes d'ovín, y 1.700 caballos.