Nel LXI Festival Internacional del Cante de las Minas de La Unión, el concursu de mayor reconocencia nel mundu del flamencu, el miércoles pela nueche sonó un "¡Puxa Asturies!" que-y supo a gloria a Celestino Rozada. Tamién a Rubén Álvarez, a Lorena Corripio, a Fernando Vázquez Cárcaba y a Vicente Prado, "El Pravianu". A los trés intérpretes y los dos gaiteros que, en representación del Concursu de Tonada "Ciudá d'Uviéu" –los cuatro primeros como ganadores de les distintes categoríes na última edición y El Pravianu na so condición de gaiteru oficial del certame uvieín–, xubieron al escenariu de la conocida como "catedral del cante". 

Yera la xornada inaugural del festival murcianu y a ellos tocó-yos respiga-y el pelleyu al públicu coles sos pieces asturianes llenes d'histories mineres. 

"Impresionáu", diz Rozada que se sintió enantes, mientres, y dempués d'actuar en La Unión. "Nun esperaba otro; pero una cosa ye dicilo y otra vivilo; sentí nervios porque ye un escenariu de los más grandes d'España pero foi too perbién, sentíme mui queríu", rellata reconociendo que, por muncho que sepas que vas actuar nún de los templos del flamencu n'España, "hai que tar ehí". Y hai que lo disfrutar, como fixo él cantando "Soi pastor" y "La Carbonera". 

Toos coinciden en que volvieron a Asturies coles alcordances d'una esperiencia "meyor, imposible. Había muncha xente siguiendo l'actuación y el públicu taba mui animáu", cuenta Rubén Álvarez González, el campeón mozu de la edición 2022 del "Ciudá d'Uviéu", festival col que collabora LA NUEVA ESPAÑA. "Viva la xente minero" y "Tengo de xubir al puertu" fueron les pieces qu'entonó Rubén. "Sentíme mui a gustu; repitiría munches vegaes", recalca. Igual que'l gaiteru Fernando Vázquez Cárcaba. "Ye un escenariu qu'impon, pero date unes ganes increíbles de tocar. Ves al públicu que-y provez ver lo que vas facer, percibes el respetu qu'hai pola música de toa mena y resulta impresionante. Quedes con munches ganes de volver", asegura. Nel so casu pudo llucise cola tema "La fonte de Miravete", y un floréu asturianu. 

"Qué bien parez un mineru" y "En tola quintana" fueron, pela so parte, les pieces que cantó Lorena Corripio López. "Foi un auténticu placer poder tar ellí representando a Asturies y al concursu ‘Ciudá d'Uviéu’. Diéronnos una acoyida maraviyosa y, como toos, yá tengo ganes de volver". A Celestino y a Lorena acompañólos Vicente Prado, "El Pravianu", el gaiteru oficial del concursu asturianu, que regaló al auditoriu amás la so pieza "Benditos mineros". "Foi una esperiencia maraviyosa y, sobre manera, porque nos dieron un tratu que nos fixo sentir como artistes a nivel internacional", describe. 

La segunda parte que va completar esta esperiencia de collaboración va vivise n'Uviéu'l 26 d'ochobre cuando actúen n'Asturies los ganadores nes categoríes de Lámpara Minera (cante) y Desplante (baille femenín y masculín) del festival de La Unión. La edición del "Ciudá d'Uviéu" d'esti añu va llegar con una novedá, una nueva modalidá que va ser la de "Xente mozo" que pretende activar la participación de músicos ya intérpretes menores de 13 años.