"El Volcán". Asina llamaben, a finales del sieglu XVIII, al fornu altu de la fábrica de Trubia. Foi ellí, nesi inxeniu d'espresivu nome, onde'l 10 de xunetu de 1797 se fixo la primer colada de la fábrica: l'amiestu de fierro y carbón que, una vegada fundíu, utilizábase como base para facer material armamentístico. Esti día, Trubia reivindicó esi pasáu industrial con una espectacular recreación histórica d'esi acontecimientu, na que participaron más de mediu centenar de persones, delantre d'un gran xentíu. 

Naide en pueblu quixo perder la representación, y asina se vio na plaza del Xeneral Ordóñez, popularmente conocida como "La Plazoleta", que taba atarraquitada. Foi una cita d'asistencia obligatoria pa los trubiecos y curiosos. P'axuntar a pequeños y mayores y conocer, o recordar, la historia tan importante de los anicios de la so industria, de Trubia y d'Asturies. 

La recreación entamó cola salida del que yera entós director de La Real Fábrica de Municiones Grueses de Trubia, Ignacio Muñoz de San Clemente, encarnáu por un actor. Siguíalu una brañada d'autoridaes, ente elles l'obispu d'Uviéu. Darréu entraron n'escena los mineros que trabayaben el fierro, enseñando cómo lo cargaben, al costazu o nun carru tiráu por dos gües descomanaos. 

La representación tuvo una parte dramática, cuando s'escenificó la revuelta de los mineros, arriendes d'un escritu unviáu al director de la fábrica. Pero nada podía detener la colada, bendita pol obispu y pol rei Carlos III, que dio'l so beneplácitu hasta en cuatro cartes. Llegó entós l'encendíu del "Volcán", con un efectu de fumu que plasmó a los espectadores. "Cómo díbemos esperar que diben llantar esto equí, con efectos especiales incluyíos", esclamó sorprendida Elena Pérez, vecina de la localidá, al ver la fumareda. La colada, dicen los llibros d'historia, nun salió bien, pero aquel foi l'entamu d'una fábrica d'armes que, anguaño, sigui funcionando, 225 años dempués. 

El públicu nun perdió nin gota detalle de la hora y media que duró un espectáculu con un aquel de superproducción. Vestuariu de dómina, animales, xarres, cañonazos, fumu, música dieciochesca y, sobre manera, la entrega de los actores fixeron que'l numberosu públicu creyera tar asomáu a una auténtica ventana al pasáu. El colofón llegó col himnu d'Asturies y con una sentencia que, antaño, tuvo de ser lema en Trubia: "N'Uviéu hai dos catedrales: el Salvador y ‘El Volcán’ de Trubia, que da l'arsenal".