L'asociación Reciella-Families pol Asturianu publicó esti domingu pasáu'l videoclip de 'L'asturianu conéctate', un títulu que coincide col lema del IX Día de la Reciella y que ta compuestu por Alfredo González.
El Día de la Reciella ye un eventu festivu de tipu familiar entamáu pola asociación Reciella, nel qu'a lo llargo d'un día completu, dende pela mañana hasta pela nueche, hai actividaes, talleres, conciertos y muestres deportives que tienen como nexu l'usu del asturianu como llingua vehicular.
Esti eventu gratuitu y abiertu qu'axunta a miles de personses lleva celebrándose dende l'añu 2012 en Xixón, nel Muséu del Pueblu d'Asturies el primer domingu del mes d'ochobre --nesta ocasión el 1 d'ochobre-- y dende hai dellos años la so promoción inclúi la publicación nes selmanes previes d'un cantar específicu realizáu por una banda o artista asturianu.
Skama la Rede, David Varela o Pop Piquiñín foron dellos de los interpretes que participaron, a los que se suma agora Alfredo González con un videoclip que yá ta disponible na rede.
Realizáu y dirixíu por Pablo Quiroga Prendes, 'L'asturianu conéctate' grabóse en Xixón y Villaviciosa. La lletra, escrita por Alfredo González, tresmite un mensaxe positivu que fala de les posibilidaes que tien la llingua asturiana pa usase na vida moderna y, al traviés d'ella, conectate y comunicate con otres persones.
