La ría de Ribadeo ye'l topónimu a caltener na cartografía oficial. Asina lo comunica nun informe al que tuvo accesu esti periódicu la Comisión especializada de nomes xeográficos del Ministeriu de Tresportes, Movilidá y Axenda Urbana. 

Ría del Eo va ser un topónimu "alternativu" y "oficial" (enantes yera d'usu menor) y podrá utilizase como tal, pero l'indicador xeográficu que va figurar nos mapes va facer referencia solo a la localidá lucense. 

La resolución, cola que tien que tar conforme l'Institutu Xeográficu Nacional según el Principáu, pon pel momento fin a un llargu procesu qu'enfrenta al gobiernu asturianu y a la Xunta de Galicia. Magar la propuesta del gobiernu d'Asturies (fecha pol diputáu del PP Álvaro Queipo) convidó a la reflexón en 2019, en Galicia nunca dieron por válidu'l topónimu mayoritariamente utilizáu na marxe asturiana del estuariu. Ello ye que la Xunta recurrió la decisión primera del Institutu Xeográficu Nacional d'igualar nel usu y facer oficiales entrambos dos topónimos. 

El Ministeriu tuvo que volver alzar a consultes el procesu en cuenta de la falta de consensu. El Principáu ta a la espera d'una decisión firme del Institutu Xeográficu Nacional y recuerda que la comisión de nomes xeográficos "yá emitiera un primer informe sobre'l tema ría del Eo / ría de Ribadeo nel que daba la razón al pidimientu formuláu dende la Conseyería de Cultura, Política Llingüística y Turismu d'Asturies". "Espérase que s'atienda la petición d'Asturies", avisen fontes de la Conseyería. 

Na zona asturiana que baña la ría, hai descontentu. L'alcalde d'A Veiga, el socialista César Álvarez, detalla, al marxe de resoluciones ya informes, "que nun se puede dar por válido daqué que ta basao no que ye, una mentira". El rexidor cree que si hai que llamar a la ría col nome de la localidá que baña que tien más importancia "tendría que ser ría de Castropol, que ye partíu xudicial, porque Ribadeo solo tien puertu y más población". 

L'alcalde de Castropol, el socialista Francisco Javier Vinjoy, pela so parte, considera que ye positivo que se faiga oficial el topónimu, magar "el deséu ye tar al mesmu nivel en tolos casos". "Meyorala situación de partida, pero nun se cumplen los nuesos deseos", conclúi'l mandatariu castropolense.