Gonzalo G. Barreñada (Sotrondio, 1973) llegó a la lliteratura n'asturianu col poemariu Biografíes (Saltadera, 2016) y agora fai entrega de la so primer novela: una narración que presenta dividida en dos partes, con un primer desenllaz que llega muncho antes del final, y onde arriesga con una propuesta argumental que va sorprender al llector.
La casa de Xuan Buelga (Saltadera, 2018) empieza siendo una historia que pinta realista, seria, esistencial, protagonizada pola figura d'un perdedor qu'enfrenta la soledá y la vida que-y queda después de pasar más de venti años na cárcel por matar a dalguién. Xuan Buelga escueyi Xixón p'avezase a los primeros díes de la so estrenada llibertá y percuerre señaldosu les cais de la ciudá, esplicándose con llirismu mientres se retrata a sí mesmu o trai una imaxe emotiva de la infancia. Con una priesa inesperada, propón-y a una muyer desconocida a la que ve nun bar un tratu peculiar: que seya la so compañera agora que tien que volver a so casa y so pueblu. Mirita Morena nun tarda muncho n'aceptar la propuesta de Xuan Buelga y anque roceana en dalgún momentu, consiente en qu'ella y Lola, la so fía, seyan los sofitos que precisa Xuan Buelga na so vuelta a Burgundu. ¿Qué siente Xuan Buelga pol llugar nel que nació, qué siente por Mirita Morena, esta muyer inesperada? "Acordóse del nerbatu que s'alimenta del frutu del lloréu; de la peñerina cuando busca saltapraos y escarabayos; de les curuxes qu'a los dos meses marchen de casa; de les rosalíes na madera podre de les fayes. Al decatase de cuánto deseaba falar d'estos asuntos con Mirita Morena preguntóse si, en realidá, nun taría hasta un poco namoráu d'ella". Pero la cara solombría y el cinismu del home asomen ensiguida, cuando gasta agresividá con Mirita o convida a la nena a beber un tragu de vinu. Sicasí, son señes que nun acobarden a les dos muyeres, que lu siguen, valientes, al llugar al que tien que volver. El sitiu ye una casa con nome, La Chinita, "colos sos tres pisos alicataos de blancu", unos kilómetros más p'arriba del pueblu de Beles. Delantre del edificiu, Mirita nota, per primera vegada, que pisa "una cárcova que servía pa facer de llende ente dos reinos". Y ye que'l so nuevu hogar ye una casa tomada, onde convive tol pasáu de Xuan Buelga n'inquietante compañía col presente. Mirita tien que se preparar pa vivir con un atormentáu y pa competir coles muyeres qu'hubo enantes qu'ella, metiéndose nuna peligrosa llende ente la vida y la muerte, nun mundu nel que una nena de diez años ye'l personaxe más salvadoramente posáu na realidá. A la par, el paisaxe y les estaciones van casando bien col ánimu de la protagonista a lo llargo del añu nel que trescurre la narración: Mirita va comportase con desasosiegu o ablayamientu pola gafedá y va volviéndose murnia cuando'l tiempu se mete n'agua, naquel llugar "más gris que verde". El relatu de la vida na casa anímase con un diálogu mui intensu y llenu d'emoción, cuasi un combate, a veces irracional, con hipérbatos, con cimblantes intervenciones d'unos personaxes que discuten sobre la culpa, el perdón, los secretos, l'amor, l'abusu de poder o la sumisión al home.
"Ai, ai, que volvió Xuan Buelga al país": ye una alvertencia de dalguién que lu conoció mui bien. Atentos a tolos mensaxes d'esta ficción tan orixinal, bien pensada, bien escrita, con rasgos que'l propiu autor califica de "realismu pantasmagóricu". Atentos tamién a la vuelta de Gonzalo G. Barreñada a la lliteratura n'asturianu, confirmando equí que llegó pa quedase, como'l so protagonista, y que tien un importante imaxinariu pa desplegar.
