Cola rapidez qu'impunxeron les circunstancies, Ediciones Radagast atropó en pocu tiempu un conxuntu de relatos col envís de que pudieran acompañar y entretener al llector nesta parada obligatoria na que se vive, anque alvirtiendo que'l títulu tien que ver col momentu de la edición, pero non coles consecuencies d'esta pandemia qu'impón la nuesa zarradura. Asina que vamos alcontrar temática llibre nestes ficciones, histories toes elles pa velar estos díes, anque non necesariamente sobre lo que pasa nestos díes. Un llibru en formatu dixital que s'ofrez de baldre a los llectores al traviés de la descarga na so páxina web: https://edicionesradagast.com/producto/fecho-na-cuarentena/
Ventiocho son les histories n'asturianu, gallegoasturianu y castellanu presentaes por autores noveles, aniciaos na lliteratura y nomes de trayeutoria reconocida. Dalgunos de los relatos tán fechos de recién y otros fueron escritos hai años; cuatro d'ellos resultaron premiaos en diferentes certámenes lliterarios y uno cuenta con versión en curtiumetraxe ("Ea la mio neña, ea"; con guion d' Arancha Prado y direición de Pablo A. Quiroga Prendes). La nómina completa d'autores fórmenla: Laura Marcos, Guillermo Antuña, Félix Fernández, Noelia S. García, Alba Carballo, Blanca Fernández Quintana, Claudia González Rivas, Paula Pulgar Alves, Eva del Fresno, Víctor Suárez, Cristina B. Rabanedo, Téver Díaz, Fernando Nicolás Velasco, Pepín Fernández, Juan Sebastián Quintero Santacruz, Arancha Prado, Marco Granda, Ángel Lago Villar, Inaciu Galán, Nicolás Bardio, María Luz Pontón, H éctor Pérez Iglesias, Miguel Rodríguez Monteavaro, Lluis Aique Ilesies Fernández y José Ángel Gayol.
El llector va alcontrar propuestes de variada temática y ambientación espacio-temporal: dende la ucronía a monólogos costumistes y narraciones realistes (actuales o asitiaes en tiempos pasaos); alcuentros con otres cultures y modernos personaxes de la picaresca que sobreviven de manera sorprendente; muyeres lluchadores derrotaes pola violencia machista, pol dolor de la perda o pol cinismu y la inxusticia d'una sociedá callada énte'l poder opresor; dalgunos exemplos de lliteratura fantástica qu'arriquecen el panteón de la mitoloxía asturiana; un requexu acutáu pal públicu infantil (con un modernu cuentu de príncipes y princeses y una ayuda pa recibir ensin rocees al hermanu que naz). Asoma lo naíf y apaez el simbolismu pa falar de la soledá, la tristura, la muerte y el desamor, pero tamién s'escueyen argumentos y personaxes corrientes pa contar el final d'una rellación de pareya, una unión que s'apaga selemente o que lo fai de sutaque; estaos de callada desolación o arrebatos qu'acaben nun tráxicu desenllaz. Bien representada queda la ciencia-ficción, un xéneru qu'en momentos como'l que vivimos seique s'amuesa muncho menos especulativu de lo que quixéramos: avances inesperaos de la ciencia, un viaxe interestelar o la solución pa cómo ganar al ataque d'un nanovirus son dalgunos de los acontecimientos que nos aguarden. Mui interesantes son los cuentos que s'inxerten dientro de la narrativa de terror y prienden bien l'interés y el desasosiegu: dalgunos descubren dende'l principiu a un psicópata asesín, otros esploren la simple inquietú y badien nesa llende solombriza ente lo real y lo irreal; cuasi toos faen que miedre'l misteriu y el pruyimientu hasta amedranar a los personaxes y los llectores. En definitiva, percorremos un exemplariu de los motivos y les esmoliciones de la sociedá d'anguaño, ensin escaecer l'esconxuru y homenaxe a les palabres que fai Mariluz Pontón: "Llegó'l momentu de les palabres que remen escontra'l pasu del tiempu. / Palabres que restallen colos besos apasionaos y los sospiros mecánicos. / Palabres que llimpien con algodones los infestaos versos de los suaños".
Mensaxe final pa la resistencia y pa la esperanza: "¡Aguantái, que nun queda nada!". El que conoz la lliteratura sabe que siempre ye una vacuna pa siguir y esperar por tiempos meyores.
