2022. Dos años y dos meses depués del andanciu y el degredu d’estáu d’alarma que firmó’l gobiernu. Dos años bien especiales – y por desgracia non pa bien– na vida de les persones pero, tamién, dos años perinteresantes pa una lliteratura asturiana que se remocica (en tolos sentíos de la pallabra) a pasos axigantaos. En 2020 el qu’esto firma yera con 33 años el novelista más mozu d’estes lletres, duldosu honor que llevaba yá dende 2008. Agora, namás dos años depués, descubrimos talentos como los de Xaime Martínez (1993), qu’asoleyó la novela “La Fuercia” y el llibru-discu “Ósculos d’Agua”. Blanca Fernández Quintana (1994), que tien asoleyaes dos noveles, “L’Home les Caparines” (yá pela segunda edición) y “Trovadoresca” (Premiu “Radagast” 2020), y que ganó amás el Premiu “Enriqueta González Rubín” con una tercera pa publicar. Esti mes de febreru, el relevu de novelista más mozu garrábalu Andrés Fernández (2003) cola ucronía “1809: Cartes de la Revolución de Trubia”, qu’escribió con namás 17 años y asoleyó con 18. Y va poques selmanes la escritora de fantasía Kai C. Torel (1995) ganaba’l concursu lliterariu “Ensin muyeres nun hai idiomes”.
Sicasí, too esto nun ye namás una cuestión de mocedá y de “millennials” o “zoomers” faciendo lliteratura n’asturianu. Ye una renovación temática en toa regla, y tamién de los soportes de la narrativa: en dos años, dos ucroníes asoleyaes, tres noveles de fantasía (y otres dos más p’asoleyar)... Pero tamién un xuegu de rol d’espíes, “Depués d’Ochobre”, que foi pioneru n’asturianu, y un videoxuegu de salida inminente –tamién de fantasía y tamién pioneru n’asturianu–, “Tiempu de Lleendes”, d’Adrián Carbayales. Les lletres asturianes renuévense a pasos de xigante o, meyor dicho, d’homón y pataricu, y fáenlo col oxetivu de conectar con una mayor cantidá de xente y facese ver y sentir n’eventos d’importancia, como’l Festival Celsius 232 o la CometCon. Si activistes “millennials” como Víctor Suárez y el recién nomáu académicu Inaciu Galán foron a poner l’asturianu na Wikipedia al primer nivel o de montar una plataforma audiovisual tan potente como PlayPresta a fuercia de munchísimu trabayu y hores echaes; otros, como Carbayales, tán faciendo lo propio por que tea tamién en Steam.
Falla, como siempre, la pata institucional, a la que-y cuesta negociar una mísere llei audiovisual qu’obligue a plataformes como Netflix o HBO a emitir n’asturianu una parte de lo que tienen. El cine y les series acoxen. Anque al candor del Andanciu surdieren iniciatives bien prestoses y feches con cuatro duros como la webserie “Confinaos”, estos proyeutos nun tuvieron continuidá.
El relevu llegó a les lletres, y fíxolo pa garrar con determín y enfotu la llama d’una llingua que sigue viva dende la Edá Media
El relevu llegó a les lletres, y fíxolo pa garrar con determín y enfotu la llama d’una llingua que sigue viva dende la Edá Media. Probablemente nun vaiga escoyer los mesmos caminos que percorrieron los que vinieron primero, nin vaiga a la velocidá que-yos gustaría; como probablemente nós tampoco aprobemos les escoyetes de los que vengan detrás. ¿Pero nun ye eso, a fin de cuentes, vivir y avieyar? Llevar la llama a nuevos horizontes nos que nunca tuvo nun ye dalgo que tea faciendo esta xeneración de nuevos creadores; al contrario, foi xustamente eso, el llevar el fueu a onde nun tuvo, lo que mos aprendieron creadores y activistes como Pablo Antón Marín Estrada, Marta Mori, Xuan Xosé Sánchez Vicente, Dolfo Camilo, Antón García, Esther Prieto, Nel Amaro, Xulio Viejo, Ana Cano, Aurelio González Ovies, Miguel Rojo, José Ángel Gayol, Xosé Lluis García Arias, Xilberto Llano, Xulio Arbesú, Esther García, Xosé Antón González Riaño, Pablo Rodríguez Medina, Vicente García Oliva y munchos y munches más que nun m’entren y, por supuesto, cómo non, Ígor Medio. A toos ellos: gracies por ser exemplu.
