Xunu arumaba a vacaciones, a cai de mañana a nueche, a playa, nun teníemos maquinines pero nun nos facíen falta. Sele, el colexu diba desdibuxándose acordies el mes avanzaba y les cais del barriu El Carmen enllenábense de xarana. La rapazada de la cai Almacenes teníemos un vezu, amás del de la playa, sacábemos permisu pa pescar con retel, díbemos a la pescadería Cervantes a por cabeces de pexes que nos aidaren na xera y corríemos pal Muelle como llocos a pescar quisquilla, andariques, cangarexos..., la mar entá tenía vida y los neños andábemos pela cai en llibertá.
¿Ónde tán agora los neños? Nun se-yos ve xugar pela cai nes vacaciones, nun s’aventuren na ciudá a charrar gayoleros y bromiar, nun van a la Punta a escorrer les foles hasta qu’una los mueye dafechu... ¿Ónde tán? Tiénenlos de colonies, de cursillos, faciendo dalgún deporte, mil actividaes que los zarra nuna ciudá tristaya na que sobra la infancia. El tiempu de los mercaderes oblígalos a facese mayores ensin llegar a ser neños o mozos, a salir pela nueche a los chiringuitos, a sentise adultos cuando la vida entá nun-yos enseñó a xugar daveres.
La queda nun cotiza en bolsa, nin se cobra por ella nos chigres y, muncho menos, nenguna marca de videoxuegos obliga a los rapazos a pagar pa divertise con ella. Ehí ta quiciabes el problema, les persones llegamos a pensar qu’aquello polo que nun se paga nun val un pimientu. Llegaren a llavanos el celebru a niveles tan alloriantes como que pa divertise hai de pagar, que les mazanes que nun guarden les formes del mercáu en tamañu y color son defeutuoses, que’l xerséi que te texó to güela nun ta de moda...
Y lo malo alcuéntrase en que los adultos dexamos qu’a la rapazada tamién-yos introduzan estos valores falsos, que namái aquello polo que se gasta dineru paga la pena.
