Adrián Carbayales ye uvieín de La Corredoria, paráu, amu de casa y amás llicenciáu en Filosofía. D’Informática sabe lo xusto pa restolar pela rede y delles coses más, por embargu ye’l creador d’un videoxuegu, el primeru de la hestoria n’asturianu. Llámase “Tiempu de lleendes” y nun fala de lleendes urbanes sino d’un mundu na dómina medieval que tien a Xandria como la so protagonista. “La hestoria foi: gustaríame xugar a un videoxuegu n’asturianu, voi poneme a facer ún”, reconoz Carbayales, de 36 años. Y asína foi. Entamó a trabayar con un programa con plantilles y bancos d’imaxes y soníos y creó’l so propiu universu medieval, como si se tratare de pieces de Lego, un rompecabeces nel que dibamontando unes partes con otres, con casielles pa diálogos y riegles, combates y demás xeres y too na llingua qu'entamó a descubrir gracies a dos de les aventures de Tintín n’asturianu nos años ochenta del pasáu sieglu: “La islla prieta” y “Stock de cock”.
“Tiempu de lleendes” ta basáu en dos xéneros: el xuegu de rol –RPG na xerga– d’estilu xaponés como podríen ser “Secret of Mana”, “Pokemon” o “Final Fantasy” entemecíu col humor de les aventures gráfiques de los años noventa del sieglu pasáu como “Monkey Island” o “King’s Quest”. “Son dos xéneros que me prestaben muncho cuando yera un neno”, diz el creador de “Tiempu de lleendes”. Pel momentu, el xuegu ta en plenu procesu creativu: “Llevo feches unes 350 hores de xuegu”. Entá queda llabor hasta algamar el so oxetivu y definir pantalles, prebes y personaxes: “Tien qu’haber ente 500 y 600 hores pa finalo”.
Xandria, la protagonista del videoxuegu, ye una estudiante d’una escuela de maxa –como si se tratara d’un institutu de la dómina medieval– y ente pantalla y pantalla tien la posibilidá d’emplegar el fueu, l’agua, piedres o l’aire. Tien amás dellos collacios colos que s’atopa pel camín nuna hestoria “con dellos finales distintos”. Como en tolos videoxuegos y aventures d’esi calter, hai un malu malísimu nomáu Zargos o Señor escuru. “Esos nomes, que son ficticios, nun esisten pero podíen sonar a nomes asturianos”, apuntó el creador de “Tiempu de Lleendes”. El fechu de que l’idioma central del videoxuegu seya l’asturianu, afonda Carbayales, puede ser una bona ferramienta educativa p’averar l’idioma a los neños y no tan neños, los que como él, deprendieron y esfrutaron col mundu de los videoxuegos allá pelos años noventa, cuando los gráficos ameyoraben y nun esistíen entá les tres dimensiones nin nada asemeyáu. “L’oxetivu principal del xuegu ye que preste, esi ye l’envís aunque hai dellos maestros que punxeron interés en ‘Tiempu de Lleendes’, hai delles persones que, amás dixeren que ta nun asturianu cuidáu”, espresó Adrián Carbayales.
El creador del primer videoxuegu n’asturianu del que ya ta disponible la demo pa Windows y Linux camienta que puede tar llisto pa l’añu que entra. Pel momentu, Carbayales ya camienta nuna campaña de crowfunding p’ayudar a financiar el proyeutu.
“Tien que quedar claro que si faigo esti videoxuegu n’asturianu nun ye pa salir na Wikipedia como el primero que lo fixo sinon col envís de mover la rueda”, dixo’l creador, qu'espera que les persones interesaes en propuestes similares sigan desendolcando idees como la de un videoxuegu y ayudar a normalizar la llingua asturiana.
