Los rapazos de segundu de Bachilleratu del IES Doña Jimena de Xixón dieron el saltu a la gran pantalla esta Navidá. Acaben de poner el ramu a un calendariu cinéfilu con escenes inolvidables de la historia del celuloide: dende “Casablanca” o “Cantando baxo la lluvia” a “Pulp Fiction” y “Gilda”. “Tán trabayando muncho, quedó-yos perbién, y la idea ye orixinal”, recalca Juan Jesús Alonso, ún de los docentes del centru. El calendariu va repartise ente alumnáu, profesoráu y families.
La escusa qu’utilicen unos mozos estudiantes pa ilustrar un calendariu con fotografíes perguapes rescampla la potencia vital, filosófica, artística y poética d’obres maestres del altor de “Casablanca”, “Pulp Fiction”, “La quimera del oru”, “Gilda” o “Vacaciones en Roma”, axunta Alonso, quien diz que, de xuru, Michael Curtiz, Francis Ford Coppola, Charles Chaplin o Billy Wilder taríen encantaos de que les sos películes inspiraren los calendarios qu’agora se van vender nos quioscos de barriu y van afatar les aules d’un institutu públicu.
Magar que tean metíos dafechu nel cursu de preparación de la EBAU, los rapazos nun pierden el so bon humor y gastaron bona parte del so tiempu llibre n’amarutase d’Ingrid Bergman o en facer como los protagonistes de “Reservoir Dogs” o como Jack (Leonardo di Caprio) y Rose (Kate Winslet) en “Titanic”.
Tampoco nun falten nel calendariu cinéfilu del Jimena “Sandy” y “Danny”, los protagonistes de “Grease”, con un vestuariu que reproducen los rapazos de Xixón con procuru.
Eduardo Caso Maseda metióse dafechu nel papel de Vito Corleone en “El Padrín”. Cómo sería, que la semeya fíxose nel despachu de la dirección del centru.
Y les moces del institutu vistiéronse tamién como Audrey Hepburn en “Almuerzu con diamantes” pa ilustrar el mes de mayu o trataron tamién d’imitar la mirada de Sharon Stone en “Instintu básicu” nel mes d’agostu.
Marina González Díez, nel papel de Scarlett O´Hara y Miguel Vigil Rodiz, nel de Rhett Butler en “Lo que’l vientu se llevó”, imiten un alcuentru furtivu ente los cortinaxes del salón d’actos del institutu. Zarren el calendariu “La tentación vive enriba” y la escena de Joan Palomo Pérez como Don Lockwood en “Cantando baxo la lluvia” nel patiu del centru. Porque, pa que’l calendariu rellumara más, decidieron escoyer escenes de películes onde apaecieren los protagonistes principales y, al empar, los allugamientos del centru más afayaízos pa cola trama, lo que foi posible “gracies al entusiasmu” de los alumnos, recalquen los tutores delantre d’esta interesante iniciativa estudiantil.
