Armar un robot con pieces de Lego y que garre vida. Ye l’actividá que tán realizando los neños d’ente 6 y 14 años nes parroquies rurales del conceyu de Carreño. La iniciativa enxarétase nel programa “Tardes Gayoleres” y va desenvolvese poles tardes d’esti mes. L’oxetivu ye afondar nuna disciplina que na actualidá llévase muncho: la robótica. Asina, estos díes los CIR de Quimarán-El Valle y d’Albandi, mesmo que les antigües Escueles de Llorgozana y Perlora, ven cómo construcciones d’unos pocos centímetros d’altor y realizaes polos más pequeños caminen pelos suelos de los centros faciendo distintos movimientos.

“Los neños faen una construcción educativa. Armen con pieces de Lego siguiendo unes instrucciones que-yos da l’ordenador y una vegada que lo tienen construyíu, por aciu del software del ordenador, manden unes acciones utilizando una programación y tresmítense al aparatu per Bluetooth o per wifi”, esplica Laura García, monitora de l’actividá. El resultáu ye, por casu, una xaronca qu’avanza como si lo fixera a blincos, una peonza que da xiros y un coche que cuerre y xira.

Daqué que de mano abulta complexo, pero qu’a los alumnos resúlta-yos afayaízo gracies a la rápida introducción tecnolóxica qu’esiste anguaño nes aules a edaes bien moces y a lo intuitivo de l’aplicación. “Los alumnos tienen cierta conocencia y suel resultar-yos cenciello. A los neños d’Infantil, que son los nuevos, sí que-yos suel resultar más enguedeyao. Con too y con eso, a toos-yos gusta l’actividá”, diz Laura García.

Esta xera entra dientro del programa “Tardes Gayoleres”, que busca tamién facilitar la conciliación familiar peles tardes del mes de xunu. El so entamu naz del “Plan Corresponsables”, financiáu pol Ministeriu d’Igualdá y nel que participen el Gobiernu del Principáu y el conceyu de Carreño. Los talleres tienen una duración d’ocho hores, estremaos en dos hores al día en cuatro sesiones a lo llargo del mes.

Amás de los cursos de robótica, tamién s’ufierten xuegos y manualidades en Quimarán-El Valle, Perlora, Xivares, Albandi y Llorgozana, mesmo que na capital, Candás. “Lo principal ye qu’apriendan, y qu’apriendan pa enriba prestándo-yos”, remata Laura García.