Falen asturianu ensin torgues y con oríxenes que nin tienen que ver cola minería nin cola mar nin con vares de yerba. Munchos nacieron n’Asturies y otros malapenes lleven nesta rexón unos meses: sin embargu, a la hora d’escoyer entre Asturianu y Cultura Asturiana, garraron la primer opción. Son estudiantes de Primaria y Secundaria que quieren medrar nuna llingua minorizada.
Jesús Edada Sunday ye fíu de nixerianos, estudia nel Colexu Públicu Santa Bárbara, n’Oyanco (Ayer), y diz a les clares que quier conocer la llingua asturiana y deprender a falala. Ayako Román Shimizu estudia nel CRA Ozcos, nel aula de Santalla, y tienlo claro: "Vou a gallego-asturiano porque paréceme interesante ver lo diferente qu’é a cultura d’aquí coa de Valladolid o Xapón. É algo bon aprender cousas distintas". Ye fía d’un castellanu y una xaponesa y deprende la llingua del so territoriu. Pása-y como al colombianu de Xixón, que ta acabante de llegar a la ciudá. Llámase Sebastián Torres, ye alumnu del IES Xovellanos y cunta la so esperiencia: "Nun conocía qu’esistíen otres llingües n’España. Al llegar intereséme y préstame sentir pela cai asturianu".
Y como estos exemplos, hai escolinos d’orixe marroquí en Grau, cubano y colombianu n’Avilés, dominicanu y rumanu en Xixón y chinu en Lluanco y munchos más, y toos axúntense nesa ONU de los asturfalantes ensin mieu.
