Payares ye’l penúltimu mes del añu y tamién el de los amagüestos. Nel colexu El Quirinal d’Avilés quieren ser de los primeros y esti vienres día 4 van celebrar la tradicional fiesta de les castañes n’Asturies. Dellos rapacinos ya nagüen por saborguiar esi productu tan serondiegu amestándolu cola primer sidra de la temporada, la del duernu, que ye casi que zume de mazana. L’amagüestu ye perespecial pa los rapacinos, poro los escolinos de El Quirinal van dir vistíos de gala ensin salir del colexu, van llantar na tiesta una montera picona y lu que tien más puntos, fecha por ellos mesmos nes clases d’asturianu. Nes caberes xornaes enantes de la ponte de Tolos Santos, con cartulines, unes tisories y allegría, los escolinos de Primer cursu fixeron les sos propies monteres. Colos colores azul y mariellu, pintaron amás l’escudu d’Asturies y con pegamentu apegaron el dibuxu al tradicional sombreru asturianu.
Pel momentu, los escolinos yá calecieron motores pa lo que ye una de les fiestes marcaes n’encarnáu nel calendariu escolar. Trabayaron nel aula y el vienres llucirán les sos obres. Con sorrises y bon facer, los rapacinos yá tienen abondo andáu pa esti amagüestu, de mano dirán con montera picona, una prenda tan tradicional como ye la fiesta de la seronda.
