Fai falta más información, pero lo poco que sabemos tien sustancia. El Principáu manda una delegación de cuarenta persones a la Feria Internacional de Turismu de Madrid y, pa busca-yos posada, que se decía notru tiempu, fai una oferta pública a la que, a los requisitos económicos, suma que l'hotel nun quede a más de doscientos metros d'una boca del ferrocarril metropolitanu subterraniu. Ninguna empresa aspirante cumplió esti requisitu. Dexando pa prau que nun querer dar más de doscientos pasos hasta'l metro abulta un poco repunante, ye fácil suponer que l'elementu desmotivador pa otres empreses hoteleres que sí caíen dientro d'esi radiu seríen les perres ofrecíes. A estos cuarenta espedicionarios tamién-yos hai que dar de comer, asina que l'administración astur convocó otru concursu a tal efectu, y quedó desiertu. Taba bien conocer les condiciones, que tan poco interesantes resulten.
Estos fracasucos intrescendentes, más qu'anécdotes son, seguramente, síntomes. Ún ta convencíu de que'l casu Marea fue a l'administración asturiana lo que la destrución de les Torres Ximielgues al orde internacional, permítame usté la hipérbole. El mundu ya nun volvió a ser lo que yera. Agora, la función pública ye territoriu mináu y tol mundu pisa con munchu cuidáu pa nun salir mutiláu o, directamente, muertu. Esi cuidáu estremu del gastu públicu, a priori emponderable, puede llevar a carencies de servicios imprescindibles (nun digo que sea'l casu de Fitur) y a situaciones ridícules, como que nun se pueda nin comprar folios pa les impresores a les que, pa cerrar el círculu, nun hai manera de contratar caltenimientu porque la empresa que les punxo ya facturó los 15.000 euros de límite interanual: de febreru a febreru, d'agostu a agostu...
Una bona parte de la normativa que paraliza o, polo menos, torga'l desenvolvimientu económicu de les instituciones públiques asturianes escede les competencies autonómiques, pero eso nun consuela. Nun ye misión del funcionariu d'a pie correxir escesos nacíos d'un pánicu hipersensible a la corrupción qu'acaba tresformándose nun problema que sustituye a otru. El remediu del subordináu ye siempre la filigrana: un riesgu indeseable nuna administración qu'entendemos con vocación rectilínea, luterana. La espada pa cortar esi nudu cafiante remánenla manes con responsabilidaes de gobiernu.
Nun sabemos cómo s'iguaría lo de la cama y el platu de los cuarenta de Fitur, probablemente gracies a la filigrana d'algún espíritu creativu qu'echaría mil pestes por vese obligáu a andar al borde del escobiu. Probe alma parcheadora: deseámoste tamién a ti felices sueños y una bona dixestión.
miliorodriguezcueto.wordpress.com
