-¿Pero tu vístelu bien, ho?
-¡Uf! A mí ponme, tía, ¿qué quiés que te diga?
-Pero si ye feu pa perru.
-Qué va, Yesi, tien un aire mitológicu...
-¿Viste qué oreyes?
-En punta, fía. Y los güeyinos almendraos.
-Sí, ho. ¡Como el turrón!
-Paez frágil, pero seguro que ye fuerte y ágil.
-Ye un borrachuzu?.
-No. ¡Ye un elfo, boba! ¿No lu ves? Rafa ye un elfo, si sabes mirar bien...
-Uf. ¡Tas guapa...!
-Diz que ye de Carbayín Alto pero, en realidá, vien de la Tierra Media.
-¿Que qué ho?
-Fíjate, va de verde y marrón.
-El uniforme de la empresa.
-¡Los colores de la Madre Tierra!
-¡Tas fatal, Mariajo, fatal! Una cosa ye tar mui necesitá y otra que te trastorne la publi de Navidá.
-¡Qué mala ye la envidia, Yesica!
-¿Envidia de qué?
-Asúmelo, tía, un elfo llegó a mi vida.
-Ya. Y como sigas tomando cacharros van llegar orcos, hobbits y hasta el séptimo de caballería.
-¿Qué dices?
-Nun bebas más, tía, dispárasete la fantasía.
-Seguro que vive nel bosque, voi marchar con él, cambiar de vida?
-¡Qué inocentona yes!
-¿Por?
-Tas afectá por la mezcla de cubatas y anuncios de El Corte Inglés.
-¡Toi enamorá, Yesica! ¡Un elfo llegó a mi vida!
-Que no, Mariajo, que bebiste mucho y tas salida?
-Tú fíjate en Rafa. Ye una deidad.
-Sí, ho. ¡Jajaja! Sesenta años "deidad".
-Uf. A mi los maduritos ruinos de aspecto humanoide me ponen?
-¡Voi llevate pa casa, Mari, antes de que haya una desgracia!
-¿Desgracia de qué? Tiro pa Muniellos, empiezo nueva vida con él.
-Pero si ta tan borrachu como tú. Namás sabe farfullar.
-No, no. Él habla en élfico, como yo.
-¿Que qué, ho?
-Somos criaturas de la mitología nórdica los dos.
-Uf. ¡Menudu tablón pillaste, Mariajo, menudu tablón!
-Déjame vivir en un mundo fantásticu.
-Yo déjote lo que quieras pero luego nun vengas quejándote.
-¿Por?
-La vida nun ye un cuentu de hadas.
-Selo yo.
-Pues deja ya de sublimar a tolos fistros que paren pol bar.
-Rafa ye un elfo, tía, ¿qué quies que te diga?
www.parandoenvillalpando.com
