Suscríbete

Contenido exclusivo para suscriptores digitales

Milio Rodríguez Cueto

esti güevu sal quier

Milio Rodríguez Cueto

Relaciones peligroses

El domingu del Corpus, el PP d’Uviéu fue a la misa del arzobispu. En saliendo de la Catedral, alcalde y conceyales firmaron, nuna mesa emplazada na Escandalera, contra los indultos a los condenaos catalanes. Tamién l’arzobispu predicó, como suel facer, entemeciendo lo de Dios colo del César. Dixo que ta más contentu cola corporación actual que cola precedente. Y pidió-y a la feligresía rezar polos que “fomentan la impunidad”. Usté y yo entendemos qu’esos pecadores necesitaos d’oración son los de la corte de Pedro Sánchez.

Escribió San Marcos qu’enseñó Cristo (Mr. 11.25): “Y, cuando teais rezando, perdonái, si dalgo tenéis contra alguién, pa que tamién el vuestru Padre que ta nos cielos vos perdone a vosotros les ofenses.”

¡Qué difícil, pa un español de pro, la disyuntiva ente cristianismu y patria!

El llunes, Wenceslao López, alcalde que fue de la heroica y pigarciosa ciudá y actual cabezaleru de la oposición socialista, enfocicáu, mandó-y carta al arzobispu reclamándo-y “respeto y lealtad institucional”. Ún discrepa con López. Nun tien razón de ser esta petición. La Ilesia nun ta más obligada a la llealtá institucional que la FADE o’l Centru Asturianu porque nun forma parte de les instituciones del Estáu. D’eso ye de lo que trata, xusto, estremar Ilesia y Estáu. Ya sabemos que sonseñor Sanz Montes carga pa la derecha y que, ateniéndonos a les sos intervenciones en púlpitu, nun paez que conciba una grei con otru enclín. Bueno: no d’él, ye l’amu del prau. Tien perfectu derechu a abrir sucu baxeru alredor de la finca y echar fuera les oveyes prietes, o coloraes. Y, tocante al respetu… ¡bah, don Wencesalo, ye reivindicación de raperos!

Pero sigue la novela epistolar. Na páxina pela qu’abrimos esta versión carbayona de “Les relaciones peligroses”, la marquesa de Merteuil y el vizconde de Valmont ya anden trevesaos: l’obispu tamién manda epístola, irónicu. Acuérdase de cuando, nel pasáu, los xunía una querencia, llibertina si se considera en términos ideolóxicos, pero confiésa-y a López que, agora, ta más a gusto con Cécile de Volange, digo con Alfredo Canteli. Afirma que les sos palabres interpretáronse mal y aconséya-y a López que vaya a oílu a misa si de verdá quier saber lo qu’opina (esto tira más a “La Regenta”, ye verdá). Y culpa de la confusión a una “exégesis mediática infundada”, que vien a significar (y atrévome a meteme yo a eségueta) que los periodistes son unos zotes incapaces d’entender les sutileces prelaes. Remata la carta acompañando’l nome cola sigla ofm, prevocación pa “plumillas” ignorantes qu’igual les entienden como “ofimáticu” o “oftalmólogu”, cuando son les iniciales franciscanes “Ordo Fratrum Minorum”.

A la salida de la misa del Corpus, Canteli echaba de menos les freses tradicionales con unes frases misterioses, que tamién piden eségueta: “Esperemos que el año que viene podamos volver a comer las fresas. Pero las del año que viene, las de este no.” Yo, a lo del arzobispu, llego; a esto, non.

Ya nos ta vagando una misiva del caballeru Danceny.

miliorodriguezcueto.wordpress.com

Compartir el artículo

stats