–¿Visti qué plan?
–Déxalos.
–Allá ellos, ¿oíste?
–Cola escusa de sacanos a pasiar…
–Yá, ¡menudu cuentu!
–Lo que queríen yera enrrollase, ligar.
–Y mientres: vete a pol palu, traeme la pelotina, paquí pallá…
–Nun sé a quién quieren engañar…
–El mi amu piensa que nun doi cunta pero siempres me provoca por que faiga moneríes delantre d’ella.
–Pos la mía, teníes que vela…
–¿Por?
–Da mil vueltes pa salir de casa, paez una guaja.
–¿Por qué se pondrán tan pijos en San Valentín, ho?
–¡Qué sé yo!
–¿Visti ella como se pintó pa salir a velu?
–Y él tráxo-y una flor.
–A mi hasta me punxo nel collar un corazón.
–¡Y él a mi, ho!
–Tamos guapos. A ver lo que duren, ¿oíste?
–Dígotelo yo.
–Na. En trés selmanes yá me veo cambiando de parque.
–¿Por?
–El mi dueñu ye bien inestable.
–Anda, que la mía…
–¿Tamién, ho?
–Ye mui enamoradiza. Y el parque ye una mina de solteros.
–¿Tu celaste?
–Qué va. Yo non me celo.
–Yo tampoco. Lo malo ye de nueche tener qu’aguantalos.
–¡Guau! ¡Eso ye verdá!
–Les caricies que nos dan en plan: menudu chascu, qué injusto ye tou..
–Sí, sí: l’amor ye una mentira, nun esiste, yes la única que m’entiende…
–¡Guau! Qué me vas a cuntar.
–Lo que me fastidia ye que nos utilicen pa ligar, pa pillar cachu.
–Yá. Mira, el míu yá nun trai nin la bolsa pa recoyer la mierda.
–¡Claro, como ta tan pendiente de Cupido…!
–Nun saben que Cupido lleva pañal, porque siempres la caga.
–¡Jajaja! ¡Míralos, tán a lo d’ellos!
–¡La madre que los sibló! ¿Y los díes que me fixo correr detrás de ti?
–A mi él fíxome igual. ¡Güela, dicíame, huelela! ¡Va prestate!
–Uf, calla qué estrés.
–Nun fui yo, foi culpa d’él.
–Yá lo sé. Pero nun sintiera tanto estrés desque me sacaben quince veces al día nel confinamientu.
–Ye increíble cómo nos utilicen, eh.
–Mueve’l rabu, qu’ella te vea, dicíame’l cabrón.
–Oye, Rufo, y si nun tuvieren ellos, ¿tendríes una segunda cita conmigo?
–Sí, Marina, sí. Pero como amigu.
www.parandoenvillalpando.com